سری نگر
امریکہ اور ایران کے درمیان جنگ بندی کے اعلان کے بعد کشمیر کے مختلف علاقوں میں جشن منایا گیا، جہاں لوگوں نے اسے اسلامی جمہوریہ ایران کی "فتح" قرار دیا۔وادی کے مختلف حصوں، خصوصاً شیعہ اکثریتی علاقوں میں سینکڑوں افراد سڑکوں پر نکل آئے اور جنگ بندی کی خوشی میں جشن منایا۔
یہ تقریبات سری نگر کے علاقوں سعیدکدل اور زادی بل کے علاوہ بڈگام، بارہمولہ، گاندربل، پلوامہ اور بانڈی پورہ اضلاع میں بھی دیکھنے میں آئیں۔لوگوں نے ایرانی پرچم لہرا کر اپنی خوشی کا اظہار کیا، پٹاخے پھوڑے اور جشن کے طور پر کشمیری قہوہ تقسیم کیا۔مقامی افراد نے اس جنگ بندی کو امریکہ اور اسرائیل کے مقابلے میں ایران کی "فتح" قرار دیا۔
بڈگام میں شیعہ برادری کے ایک رکن نے کہا کہ یہ جنگ بندی ایران کی جیت ہے۔ انہوں نے امریکہ اور اسرائیل کو گھٹنے ٹیکنے پر مجبور کر دیا۔ آج ہم اسی فتح کا جشن منا رہے ہیں۔اس سے قبل کشمیر میں ایران کے ساتھ یکجہتی کے اظہار کے لیے بڑے پیمانے پر چندہ مہمات بھی چلائی گئی تھیں۔ وادی کے لوگوں نے ایران کے عوام کی مدد کے لیے رقم اور دیگر قیمتی اشیاء عطیہ کیں۔
کشمیر اور ایران کے درمیان گہرے ثقافتی، لسانی اور مذہبی روابط پائے جاتے ہیں، اور کشمیر کو اکثر "ایرانِ صغیر" کہا جاتا ہے۔
