نئی دہلی
سی بی ایس ای نے یکم جولائی سے کلاس 9 کے طلبہ کے لیے تین زبانوں کی تعلیم کو لازمی قرار دے دیا ہے، ساتھ ہی یہ بھی واضح کیا ہے کہ کلاس X میں تیسری زبان (آر3) کے لیے کوئی بورڈ امتحان نہیں ہوگا۔15 مئی کو جاری کیے گئے ایک سرکلر میں سی بی ایس ای نے کہا کہ تین زبانوں میں سے کم از کم دو زبانیں ہندوستانی نژاد ہونی چاہئیں، جو قومی تعلیمی پالیسی 2020 اور اسکولی تعلیم کے قومی نصابی فریم ورک 2023 کے مطابق ہیں۔
سرکلر میں کہا گیا کہ یکم جولائی 2026 سے کلاس نویں کے لیے تین زبانوں (آر1، آر2، آر3) کی تعلیم لازمی ہوگی، جن میں سے کم از کم دو زبانیں ہندوستانی نژاد ہوں گی۔تاہم، سی بی ایس ای نے واضح کیا کہ کلاس دسویں کی سطح پر تیسری زبان کے لیے کوئی بورڈ امتحان منعقد نہیں کیا جائے گا، تاکہ ’’تعلیم پر توجہ برقرار رہے اور طلبہ پر غیر ضروری دباؤ کم ہو۔
سی بی ایس ای نے کہا، ’’آر3 کے تمام امتحانات مکمل طور پر اسکول کی سطح پر اور داخلی بنیادوں پر ہوں گے۔ آر3 میں طلبہ کی کارکردگی کو سی بی ایس ای سرٹیفکیٹ میں مناسب طریقے سے درج کیا جائے گا۔‘‘ ساتھ ہی یہ بھی کہا گیا کہ آر 3 کی وجہ سے کسی بھی طالب علم کو کلاس دسویں کے بورڈ امتحانات میں بیٹھنے سے نہیں روکا جائے گا۔
بورڈ نے کہا کہ اسکول سی بی ایس ای کی منظور شدہ مضامین کی فہرست میں سے کوئی بھی زبان منتخب کر سکتے ہیں، بشرطیکہ منتخب کی گئی تین زبانوں میں سے کم از کم دو زبانیں ہندوستانی نژاد ہوں۔غیر ملکی زبانوں کی تعلیم صرف تیسری زبان کے طور پر دی جا سکتی ہے، اگر باقی دو زبانیں ہندوستانی ہوں، یا پھر ایک اختیاری چوتھی زبان کے طور پر۔
اس تبدیلی کے تحت سی بی ایس ای نے کہا کہ کلاس نویں کے طلبہ منتخب زبان کے لیے عارضی طور پر کلاس چھٹی کی آر3 نصابی کتابیں استعمال کریں گے، جب تک کہ ثانوی سطح کے لیے خصوصی نصابی کتابیں دستیاب نہ ہو جائیں۔اسکولوں کو یہ ہدایت بھی دی گئی ہے کہ وہ اس تعلیمی مواد کو مقامی یا ریاستی سطح کے ادبی مواد کے ساتھ مزید مؤثر بنائیں۔
سرکلر میں مزید کہا گیا کہ جن اسکولوں میں قابل زبان اساتذہ کی کمی ہے، وہ عبوری اقدامات اختیار کر سکتے ہیں، جیسے مختلف اسکولوں کے درمیان وسائل کا اشتراک، آن لائن تدریسی سہولیات کا استعمال، یا ریٹائرڈ اساتذہ اور اہل پوسٹ گریجویٹ اساتذہ کی تقرری۔
سی بی ایس ای نے خصوصی ضرورتوں والے بچوں ، ہندوستان سے باہر واقع اسکولوں اور بیرونِ ملک سے واپس آنے والے طلبہ کے لیے بھی، معاملہ بہ معاملہ بنیاد پر، کچھ رعایتوں کا اعلان کیا ہے۔
