دہرادون: ہندوستانی فوجی اکیڈمی (آئی ایم اے) کے اسپرنگ ٹرم 2026 پاسنگ آؤٹ پریڈ کے موقع پر جذباتی مناظر دیکھنے میں آئے، جہاں 9 خواتین سمیت 515 آفیسر کیڈٹس کو ہندوستانی فوج میں کمیشن دیا گیا۔ روایتی پِپنگ تقریب کے دوران اکیڈمی جشن کا منظر پیش کر رہی تھی، جہاں اہلِ خانہ اپنے بیٹوں اور بیٹیوں کے کندھوں پر نئے رینک کے بیج لگا کر ان کی کامیابی کا جشن منا رہے تھے۔

کئی خاندانوں کے لیے یہ پریڈ فوجی خدمت اور قربانی کی نسل در نسل جاری روایت کا ایک اہم سنگِ میل ثابت ہوئی۔ اس بیچ کی ایک نمایاں خصوصیت 9 خواتین آفیسر کیڈٹس کی کمیشننگ بھی تھی، جو 1932 سے فوجی افسران تیار کرنے والے ادارے کی تاریخ میں ایک اہم پیش رفت سمجھی جا رہی ہے۔ ان میں شامل شنن ڈھاکہ کو مشرقی لداخ میں تعینات کیا گیا ہے۔

انہوں نے کہا: ’’میں ایک فوجی خاندان سے تعلق رکھتی ہوں، اس لیے فوج میں شمولیت میرے لیے صرف ایک پیشہ نہیں بلکہ ایک طرزِ زندگی ہے۔‘‘ انہوں نے نوجوانوں کو پیغام دیتے ہوئے کہا: ’’بڑے خواب دیکھیں اور مسلسل محنت کرتے رہیں۔ ایک دن آپ کی محنت ضرور رنگ لائے گی اور آپ اپنے مقصد تک پہنچ جائیں گے۔‘‘ ان کے والد نے والدین پر زور دیا کہ وہ اپنی بیٹیوں کو مسلح افواج میں شامل ہونے کی ترغیب دیں۔

انہوں نے کہا: ’’میں ہر والد سے کہوں گا کہ وہ اپنی بیٹی کو فوج میں جانے کی حوصلہ افزائی کرے۔ یہ ایک باعزت پیشہ ہے جس کے ذریعے ملک کی خدمت بھی کی جا سکتی ہے اور اپنی خواہشات بھی پوری کی جا سکتی ہیں۔‘‘ پریڈ میں نمایاں کارکردگی دکھانے والے کیڈٹس کو اعزازات سے بھی نوازا گیا۔ اکیڈمی کیڈٹ ایجوٹنٹ وشال کمار نے ریگولر کورس میں پہلی پوزیشن حاصل کرتے ہوئے سوَرڈ آف آنر اور گولڈ میڈل اپنے نام کیا۔ وشال کمار نے اپنی کامیابی کا سہرا بچپن کے فوجی خواب کو دیتے ہوئے نوجوانوں کے لیے پیغام دیا: ’’اخلاقیات اور عملی قیادت کو اپنائیں۔‘‘

پرنس راج کو ریگولر کورس میں دوسری پوزیشن پر سلور میڈل جبکہ تیجس بھٹ کو برونز میڈل دیا گیا۔ خصوصی کورسز میں ہرشابھ مشرا نے ٹیکنیکل گریجویٹ کورس میں سلور میڈل حاصل کیا، بودھ راج تھاپا نے ایس سی او کورس میں پہلی پوزیشن حاصل کی اور کرن پانڈے ٹی ای ایس کورس میں سرفہرست رہے۔ 16 دوست ممالک سے تعلق رکھنے والے 34 غیر ملکی کیڈٹس میں زائف صدید الوی کو بہترین غیر ملکی آفیسر کیڈٹ کی ٹرافی سے نوازا گیا۔ لیفٹیننٹ سوربھ چودھری، جنہیں کور آف انجینئرز میں کمیشن دیا گیا، نے کہا: ’’یہ میرے اور میرے خاندان کے لیے بے حد فخر اور خوشی کا لمحہ ہے۔

اس سفر میں بہت سے نشیب و فراز آئے، جس سے یہ کامیابی اور بھی خاص بن گئی۔‘‘ ان کے والد، جو خود فوج میں خدمات انجام دے رہے ہیں، اپنے اکلوتے بیٹے کو خاندانی فوجی روایت آگے بڑھاتے دیکھ کر جذباتی ہو گئے۔ انہوں نے کہا: ’’ہمارے خاندان کی تیسری نسل اب فوج میں خدمات انجام دے رہی ہے۔ میرے والد فوج میں تھے، میں فوج میں ہوں اور اب میرا بیٹا بھی اسی روایت کو آگے بڑھا رہا ہے۔ یہ ہماری زندگی کے سب سے فخر کے لمحات میں سے ایک ہے۔‘

‘ آرین گل، جنہیں پنجاب رجمنٹ کی تیسری بٹالین میں کمیشن دیا گیا، بھی فوجی خاندان سے تعلق رکھتے ہیں۔ ان کے والد فوجی افسر، دادا اعزازی کپتان، ماموں فوج میں خدمات انجام دے رہے ہیں جبکہ ان کے چھوٹے بھائی اس وقت آئی ایم اے میں زیر تربیت ہیں۔ انہوں نے کہا: ’’ملک کی خدمت کا جذبہ ہمارے خون میں شامل ہے اور یہی جذبہ مجھے فوج میں لے کر آیا۔‘

‘ انہوں نے مزید کہا کہ اکیڈمی کی تربیت نے انہیں ایک ذمہ دار اور باوقار قائد میں تبدیل کر دیا ہے۔ ابھے سنگھ راگھو نے بھی کہا کہ اکیڈمی میں داخلے کے بعد ان کی شخصیت میں سب سے بڑی تبدیلی پختگی اور ذمہ داری کا احساس ہے۔ ان کی والدہ بھی اپنے اکلوتے بیٹے کی کامیابی پر خوشی کے آنسو بہاتی نظر آئیں۔ لیفٹیننٹ پی کے ایس کشواہا نے بتایا کہ انہوں نے جے ای ای، نیٹ اور این ڈی اے جیسے امتحانات کامیاب کرنے کے باوجود فوجی کیریئر کا انتخاب کیا اور چار سالہ تربیت مکمل کرنے کے بعد ہفتے کے روز کمیشن حاصل کیا۔ اس موقع پر صدر جمہوریہ دروپدی مرمو نے 158ویں ریگولر کورس اور 141ویں ٹیکنیکل گریجویٹ کورس کی پاسنگ آؤٹ پریڈ کا معائنہ کیا۔