نئی دہلی

مرکزی کابینہ نے بدھ کے روز سطحی کوئلہ اور لگنائٹ گیسیفکیشن منصوبوں کو فروغ دینے کے لیے 37 ہزار 500 کروڑ روپے کی ایک بڑی اسکیم کو منظوری دے دی۔ اس منصوبے کا مقصد تقریباً 75 ملین ٹن کوئلے کی گیسیفکیشن کرنا اور قریب 3 لاکھ کروڑ روپے تک کی سرمایہ کاری کو راغب کرنا ہے۔ یہ معلومات مرکزی وزیر اشونی ویشنو نے کابینہ بریفنگ کے دوران دیں۔ وزیرِ اعظم نریندر مودی کی صدارت میں منعقدہ کابینہ اجلاس میں ’’سطحی کوئلہ/لگنائٹ گیسیفکیشن منصوبوں کو فروغ دینے کی اسکیم‘‘ کی منظوری دی گئی، جس کے لیے مجموعی طور پر 37 ہزار 500 کروڑ روپے مختص کیے گئے ہیں۔

کابینہ اجلاس کے بعد ذرائع ابلاغ سے گفتگو کرتے ہوئے اشونی ویشنو نے کہا کہ اس اسکیم کا مقصد ہندوستان کے کوئلہ اور لگنائٹ گیسیفکیشن پروگرام کو تیز رفتار بنانا اور 2030 تک 100 ملین ٹن کوئلہ گیسیفکیشن کے قومی ہدف کو حاصل کرنے میں مدد دینا ہے۔انہوں نے کہا کہ اس اسکیم کا مقصد ہندوستان کے کوئلہ اور لگنائٹ گیسیفکیشن پروگرام کو رفتار دینا اور 2030 تک 100 ملین ٹن کوئلہ گیسیفکیشن کے قومی ہدف کو آگے بڑھانا ہے۔

انہوں نے مزید کہا کہ اس اقدام سے ہندوستان کی توانائی سلامتی مضبوط ہوگی اور مائع قدرتی گیس، یوریا، امونیا اور میتھانول جیسی مصنوعات کی درآمد پر انحصار کم ہوگا۔ہندوستان کے پاس دنیا کے سب سے بڑے کوئلہ اور لگنائٹ ذخائر میں سے ایک موجود ہے، جن میں تقریباً 401 بلین ٹن کوئلہ اور 47 بلین ٹن لگنائٹ کے ذخائر شامل ہیں۔ اس وقت کوئلہ، ہندوستان کے مجموعی توانائی نظام میں 55 فیصد سے زیادہ حصہ رکھتا ہے۔

حکومت کے مطابق، کوئلہ گیسیفکیشن ایک ایسا عمل ہے جس کے ذریعے کوئلہ اور لگنائٹ کو ’’سنتھیسِس گیس‘‘ میں تبدیل کیا جاتا ہے، جسے عام طور پر ’’سنگیس‘‘ کہا جاتا ہے۔ اس گیس کا استعمال بعد میں بجلی پیدا کرنے، کیمیائی اشیا، کھاد اور دیگر متعلقہ مصنوعات کی تیاری میں کیا جاتا ہے۔

اس منصوبے کے تحت سطحی کوئلہ اور لگنائٹ گیسیفکیشن کے نئے منصوبوں کے لیے پلانٹ اور مشینری کی لاگت کا 20 فیصد تک مالی ترغیب دی جائے گی۔ اشونی ویشنو نے بتایا کہ منصوبوں کا انتخاب ’’شفاف اور مسابقتی بولی کے عمل‘‘ کے ذریعے کیا جائے گا۔

کابینہ کی جانب سے جاری بیان کے مطابق، یہ مالی ترغیبات منصوبے کے مختلف مراحل سے منسلک چار مساوی قسطوں میں تقسیم کی جائیں گی۔بیان میں کہا گیا کہ کسی ایک منصوبے کے لیے مالی ترغیب کی حد 5 ہزار کروڑ روپے مقرر کی گئی ہے۔ کسی ایک مصنوعات، سوائے مصنوعی قدرتی گیس اور یوریا کے، کے لیے یہ حد 9 ہزار کروڑ روپے ہوگی، جبکہ کسی ایک ادارہ جاتی گروپ کے تمام منصوبوں کے لیے مجموعی حد 12 ہزار کروڑ روپے مقرر کی گئی ہے۔‘‘

حکومت نے ایک اور اہم اصلاح کا اعلان کرتے ہوئے نان ریگولیٹڈ سیکٹر لنکیج نیلامی فریم ورک کے تحت ’’کوئلہ گیسیفکیشن سے متعلق سنگیس کی پیداوار‘‘ کے ذیلی شعبے میں کوئلہ لنکیج کی مدت بڑھا کر 30 سال کر دی ہے۔

بیان میں کہا گیا کہ اس اقدام سے ’’کوئلہ گیسیفکیشن منصوبوں میں سرمایہ کاری کے لیے طویل مدتی پالیسی استحکام‘‘ فراہم ہوگا۔اس اسکیم کے معاشی اثرات پر روشنی ڈالتے ہوئے حکومت نے کہا کہ کوئلہ سے مالا مال علاقوں میں تقریباً 25 منصوبوں کے ذریعے 2.5 لاکھ کروڑ روپے سے 3 لاکھ کروڑ روپے تک کی سرمایہ کاری متوقع ہے، جبکہ قریب 50 ہزار براہِ راست اور بالواسطہ روزگار کے مواقع پیدا ہوں گے۔

حکومت کے مطابق، یہ اسکیم ہندوستان کی مائع قدرتی گیس، امونیا، یوریا، میتھانول اور کوکنگ کوئلہ جیسی اشیا کی درآمد پر انحصار کم کرنے میں مدد دے گی، اور عالمی قیمتوں میں اتار چڑھاؤ اور جغرافیائی سیاسی سپلائی چین رکاوٹوں سے معیشت کو محفوظ بنائے گی۔سرکاری بیان کے مطابق، مالی سال 2025 میں مائع قدرتی گیس، یوریا، امونیم نائٹریٹ، امونیا، کوکنگ کوئلہ اور میتھانول جیسی مصنوعات پر ہندوستان کا درآمدی خرچ تقریباً 2.77 لاکھ کروڑ روپے رہا۔

بیان میں کہا گیا کہ یہ ایک ایسی کمزوری ہے جو مغربی ایشیا کی موجودہ جغرافیائی سیاسی صورتحال کے باعث مزید نمایاں ہو گئی ہے۔

حکومت نے واضح کیا کہ یہ اسکیم کسی مخصوص ٹیکنالوجی تک محدود نہیں، بلکہ اس کا مقصد ہندوستان کے مقامی کوئلہ گیسیفکیشن نظام کو مضبوط کرنا اور غیر ملکی انجینئرنگ و تعمیراتی ٹھیکیداروں پر انحصار کم کرتے ہوئے دیسی ٹیکنالوجی کے استعمال کو فروغ دینا ہے۔

حکومت نے مزید کہا کہ اس اسکیم کے تحت 75 ملین ٹن کوئلہ گیسیفکیشن سے سالانہ تقریباً 6 ہزار 300 کروڑ روپے آمدنی حاصل ہونے کی توقع ہے، جبکہ اس کے ساتھ زیریں صنعتوں سے اضافی جی ایس ٹی اور دیگر ٹیکس بھی حاصل ہوں گے۔بیان میں مزید کہا گیا کہ یہ نئی اسکیم 2021 میں شروع کیے گئے قومی کوئلہ گیسیفکیشن مشن اور جنوری 2024 میں منظور شدہ 8 ہزار 500 کروڑ روپے کی کوئلہ گیسیفکیشن اسکیم کی توسیع ہے، جس کے تحت 6 ہزار 233 کروڑ روپے مالیت کے آٹھ منصوبوں پر پہلے ہی عمل جاری ہے۔