نئی دہلی: سماجوادی پارٹی کے رکن پارلیمنٹ رام گوپال یادو نے منگل کو کہا کہ بانکی پور اسمبلی ضمنی انتخاب کے نتائج بی جے پی کے خلاف عوامی رجحان کی عکاسی کرتے ہیں۔ انہوں نے الزام لگایا کہ مرکزی حکومت من مانی طریقے سے کام کر رہی ہے اور پارلیمنٹ میں اپنی اکثریت کے بل پر ایسے قوانین منظور کرا رہی ہے جو عوامی مفاد میں نہیں ہیں۔

اے این آئی سے گفتگو کرتے ہوئے رام گوپال یادو نے کہا، "یہ انتخابات ملک کے عوام کے مزاج کی عکاسی کرتے ہیں۔ حکومت اپنی اکثریت کے زور پر جو چاہتی ہے قانون منظور کرا لیتی ہے، لیکن کوئی بھی قانون عوام کے مفاد میں نہیں ہے۔ آخر کب تک لوگ یہ سب برداشت کریں گے؟ اب حد ہو چکی ہے اور مستقبل میں عوام انہیں اقتدار سے باہر کر دیں گے۔

" اتر پردیش اسمبلی انتخابات کے حوالے سے انہوں نے دعویٰ کیا کہ سماجوادی پارٹی دو تہائی اکثریت کے ساتھ حکومت بنائے گی۔ ادھر، سماجوادی پارٹی کے ایک اور رکن پارلیمنٹ اودھیش پرساد نے بھی ضمنی انتخابات کے نتائج پر ردعمل ظاہر کرتے ہوئے کہا کہ بی جے پی کو بڑا سیاسی جھٹکا لگا ہے۔ انہوں نے کہا، "بی جے پی بری طرح ہاری ہے۔

اس کے قومی صدر کی اسمبلی نشست، جو پارٹی کا مضبوط گڑھ سمجھی جاتی تھی، ہاتھ سے نکل گئی۔ یہ اس بات کا اشارہ ہے کہ ان کی رخصتی یقینی ہے۔" اودھیش پرساد نے مرکز پر تنقید کرتے ہوئے الزام لگایا کہ ملک بھر کے طلبہ کے ساتھ ناانصافی کی گئی ہے۔ ان کے مطابق، "طلبہ پر لاٹھیاں برسائی گئیں، ان کے مسائل بڑھتے جا رہے ہیں، لیکن حکومت کے پاس کوئی حل نہیں ہے۔"

قابل ذکر ہے کہ بہار کی بانکی پور اسمبلی نشست پر جن سوراج پارٹی کے بانی پرشانت کشور نے بی جے پی کے امیدوار کو 19,324 ووٹوں سے شکست دے کر پہلی بار انتخابی کامیابی حاصل کی۔ اسی طرح مدھیہ پردیش کی دتیا اسمبلی نشست پر کانگریس نے بی جے پی کو 6 ہزار سے زائد ووٹوں سے شکست دے کر اپنی برتری برقرار رکھی۔

دوسری جانب گجرات کے وڈودرا ضلع کی مانجل پور اسمبلی نشست پر بی جے پی نے ستیش پٹیل کی کامیابی کے ساتھ سیٹ برقرار رکھی، تاہم 2022 کے اسمبلی انتخابات کے مقابلے میں اس کی جیت کا فرق نمایاں طور پر کم ہو گیا۔ 2022 میں بی جے پی نے یہ نشست ایک لاکھ سے زائد ووٹوں کے فرق سے جیتی تھی، جبکہ اس بار کامیابی کا فرق 30,630 ووٹ رہا۔