ممبئی

بریہن ممبئی میونسپل کارپوریشن نے اعلان کیا ہے کہ پانی کی فراہمی کے ایک اہم منصوبے کے تحت 5 مئی سے 6 مئی 2026 کے درمیان شہر کے کئی حصوں میں 30 گھنٹوں کے لیے پانی کی سپلائی بند رہے گی۔ یہ بندش پانی کی سرنگ (واٹر ٹنل) کے کنکشن اور اس سے متعلق دیکھ بھال کے کاموں کے لیے کی جا رہی ہے۔ بلدیہ کی جانب سے جاری بیان کے مطابق، اس کام میں امر محل (ہیجوار ادیان) سے واڈالا (پرتیکشا نگر)، پریل ، ٹرومبے ریزروائر  اور تربھے ہائی لیول ریزروائر تک پانی کی سرنگ کو فعال کرنا شامل ہے۔ اس منصوبے کے تحت تربھے ہائی لیول ریزروائر کو پانی فراہم کرنے والی 1800 ملی میٹر قطر کی لائن کو ایک دوسری 1800 ملی میٹر لائن سے جوڑا جائے گا، جس کے ساتھ دیگر معاون کام بھی انجام دیے جائیں گے۔

بی ایم سی کے مطابق، اس دوران 1800 ملی میٹر تربھے ہائی لیول چینل اور 1200 ملی میٹر تربھے لو لیول چینل کو بھی بند رکھا جائے گا۔

یہ بندش منگل 5 مئی 2026 کو صبح 10 بجے سے بدھ 6 مئی 2026 کو شام 4 بجے تک نافذ رہے گی، یعنی کل 30 گھنٹوں تک۔ اس دوران کچھ علاقوں میں پانی کی فراہمی مکمل طور پر بند رہے گی، جبکہ کئی علاقوں میں کم دباؤ کے ساتھ پانی فراہم کیا جائے گا۔بلدیہ نے شہریوں سے اپیل کی ہے کہ وہ پیشگی طور پر ضرورت کے مطابق پانی ذخیرہ کر لیں اور اس مدت کے دوران پانی کا استعمال احتیاط سے کریں۔

متاثر ہونے والے علاقوں میں ایف نارتھ ڈویژن کے تحت پرتیکشا نگر، شاستری نگر، سنجے گاندھی نگر، شانتی نگر، ایچ ایم مارگ، کے ڈی گائیکواڑ نگر، واڈالا ٹرک ٹرمینس، نیو کاف پریڈ اور الامیڈا کمپلیکس شامل ہیں (جہاں 6 مئی کو پانی بند رہے گا)۔ شیو (مشرقی) اور شیو (مغربی) علاقوں میں کم دباؤ کے ساتھ پانی فراہم کیا جائے گا۔ایف ساؤتھ ڈویژن، ایل ڈویژن اور ایم ایسٹ ڈویژن 6 مئی کو متاثر رہیں گے، جبکہ ایم ویسٹ ڈویژن، این ڈویژن اور آس پاس کے علاقوں میں 5 مئی کو پانی بند رہے گا اور 6 مئی کو کم دباؤ کے ساتھ سپلائی دی جائے گی۔

بی ایم سی نے شہریوں سے ایک بار پھر اپیل کی ہے کہ وہ مناسب مقدار میں پانی ذخیرہ کریں اور اس کا دانشمندی سے استعمال کریں تاکہ اس دوران کسی قسم کی پریشانی سے بچا جا سکے۔