انہوں نے کہا كہ اگر اپوزیشن رہنماؤں کو یہ نظر نہیں آ رہا تو اس کی وجہ یہ ہے کہ ان کی نظر دھندلا چکی ہے۔ وہ بھی غربت کی بات کرتے رہے، لیکن کچھ نہیں کیا۔ انہوں نے اپوزیشن جماعتوں پر صدر دروپدی مرمو کے مشترکہ پارلیمانی اجلاس سے خطاب کے دوران احتجاج کر کے ان کی توہین کرنے کا الزام بھی لگایا۔ دریں اثنا، سی پی آئی کے پی سندوش کمار نے بجٹ پر تنقید کرتے ہوئے کہا کہ اس میں نہ عام لوگوں کے لیے کچھ ہے اور نہ ہی کیرالہ کے لیے۔

انہوں نے کہا كہ عام آدمی کے لیے خوشی منانے کو کچھ بھی نہیں ہے۔

انہوں نے مزید کہا كہ کیرالہ کو ایک بار پھر بے دردی سے نظر انداز کیا گیا ہے۔ ہم نے تفصیلی یادداشت دی، لیکن کچھ بھی قبول نہیں کیا گیا۔ کیا ہم اس ملک کا حصہ نہیں ہیں؟ انہوں نے کہا كہ ہمیں کسی فیاضی کی ضرورت نہیں ہے۔ اگر آپ کیرالہ سے 100 روپے وصول کرتے ہیں تو کم از کم 50 روپے واپس تو دیں، فی الحال ہمیں صرف 25 فیصد ہی مل رہا ہے۔ کمار نے مرکز پر لینڈ سلائیڈ سے متاثرہ وایناڈ کے لیے کوئی فنڈ نہ دینے کا الزام بھی عائد کیا۔ ادھر شیو سینا (یو بی ٹی) کی رکنِ پارلیمنٹ پریانکا چترویدی نے بجٹ میں بزرگ شہریوں کو نظر انداز کیے جانے پر تشویش ظاہر کی۔

انہوں نے کہا كہ 60 سال سے زیادہ عمر کے بزرگوں کو امید تھی کہ ان کے لیے کچھ ہوگا، لیکن ان کے لیے کچھ بھی نہیں رکھا گیا۔ انہوں نے کہا کہ بزرگوں کی دیکھ بھال سے متعلق سہولتوں اور اشیاء پر ٹیکس بدستور زیادہ ہیں، جس کی وجہ سے متوسط طبقے کے لیے یہ ناقابلِ برداشت ہو گیا ہے، اور انہوں نے بالغوں کے ڈائپرز اور وہیل چیئرز جیسی اشیاء پر ٹیکس عائد کرنے پر بھی سوال اٹھایا۔