نئی دہلی
عام آدمی پارٹی (آپ) کے قومی کنوینر اروند کیجریوال نے بدھ کے روز کہا کہ ان کی جماعت "حقیقی سناتنی" ہے اور اس نے سناتن اقدار کے تئیں سچی عقیدت کے ساتھ کام کیا ہے، جبکہ بھارتیہ جنتا پارٹی (بی جے پی) نے "سیاسی فائدے کے لیے بھگوان رام کے نام کا استعمال کیا ہے۔
اروند کیجریوال نے ایک پریس کانفرنس سے خطاب کرتے ہوئے الزام عائد کیا کہ بی جے پی اپنی تقاریر اور انتخابی مہمات میں اکثر بھگوان رام اور رام مندر کا ذکر کرتی ہے، لیکن اس کے سینئر رہنماؤں نے اب تک مندر میں جا کر درشن اور پوجا تک نہیں کی۔انہوں نے کہا کہ بی جے پی بھگوان رام کے نام پر ووٹ مانگتی ہے، لیکن وہ انہیں واقعی بھگوان نہیں مانتی۔ رام مندر میں چندے اور نذرانوں کی مبینہ چوری سے تمام سناتنی عقیدت مندوں کو صدمہ پہنچا ہے۔ بی جے پی مرکز اور اتر پردیش دونوں جگہ اقتدار سے باہر ہو جائے گی۔
بی جے پی کی جانب سے ان الزامات پر فوری طور پر کوئی ردعمل سامنے نہیں آیا۔کیجریوال نے یہ دعویٰ بھی کیا کہ رام مندر میں پران پرتشتھا کی تقریب کو دو سال سے زائد عرصہ گزر جانے کے باوجود، بی جے پی کے کسی سینئر رہنما کے مندر جانے کا کوئی عوامی ریکارڈ موجود نہیں ہے۔
انہوں نے کہا کہ یہ دعویٰ کرنے سے قبل انہوں نے عوامی طور پر دستیاب معلومات کا جائزہ لیا اور اتر پردیش کے صحافیوں سے بھی بات کی۔دہلی کے سابق وزیر اعلیٰ نے کہا کہ یہ سوال صرف وہی نہیں اٹھا رہے، بلکہ بہت سے عقیدت مند بھی اس کا جواب جاننا چاہیں گے۔
انہوں نے کہا کہ بی جے پی نے بھگوان رام کے نام پر سیاسی فائدہ تو حاصل کیا، لیکن مندر جا کر اظہارِ تشکر کرنے میں "ناکام" رہی۔
