ترواننت پورم: بھارتیہ جنتا پارٹی (بی جے پی) کے کیرالہ ریاستی صدر راجیو چندرشیکھر نے جمعرات کو کانگریس اور سی پی ایم پر ’’ترقی مخالف‘‘ اور ’’عوام مخالف‘‘ سیاست کرنے کا الزام عائد کرتے ہوئے کہا کہ دونوں جماعتیں کیرالہ کو مرکزی حکومت کی اہم ترقیاتی اسکیموں سے فائدہ اٹھانے سے روک رہی ہیں۔

فیس بک پر جاری ایک پوسٹ میں راجیو چندرشیکھر نے مرکزی وزیر ریلوے اشونی ویشنو کے بیان کا حوالہ دیتے ہوئے دعویٰ کیا کہ کانگریس اور سی پی ایم متحد ہو کر کیرالہ کے عوام کو مرکزی حکومت کے ترقیاتی منصوبوں کے فوائد سے محروم رکھ رہی ہیں۔ واضح رہے کہ اشونی ویشنو نے رواں سال مارچ میں الزام لگایا تھا کہ بائیں بازو کی جماعتیں اور کانگریس کیرالہ کی ترقی کے لیے ریلوے منصوبوں پر عمل درآمد نہیں ہونے دے رہیں۔

راجیو چندرشیکھر نے کہا کہ ریاستی حکومت کی جانب سے زمین کے حصول میں عدم دلچسپی کے باعث مرکز کا وہ منصوبہ تاخیر کا شکار ہے جس کے تحت کاسرگوڈ سے ترواننت پورم تک سفر کا وقت کم کرکے چار گھنٹے کرنا مقصود ہے۔ انہوں نے ریاستی حکومت کے مؤقف پر سوال اٹھاتے ہوئے کہا کہ ریاست کی ترقی پر سیاسی مفادات کو ترجیح دی جا رہی ہے۔

انہوں نے مزید دعویٰ کیا کہ اسی سیاسی طرزِ عمل کی وجہ سے پردھان منتری آواس یوجنا (پی ایم اے وائی)، آیوشمان بھارت، پردھان منتری اسکولس فار رائزنگ انڈیا (پی ایم شری) اسکیم اور دیگر بنیادی ڈھانچے سے متعلق ترقیاتی منصوبوں پر عمل درآمد بھی کیرالہ میں تاخیر کا شکار ہوا یا انہیں رکاوٹوں کا سامنا کرنا پڑا۔