ممبئی

بِٹ کوائن اسکام معاملے میں بالی ووڈ اداکارہ شلپا شیٹی کے شوہر راج کندرا کو ضمانت مل گئی ہے۔ راج کندرا کو ممبئی کی خصوصی پی ایم ایل اے عدالت سے ضمانت دی گئی ہے۔ بِٹ کوائن سے جڑا یہ معاملہ 150 کروڑ روپے کا ہے۔

واضح رہے کہ ایک دن قبل ہی ممبئی کی خصوصی عدالت نے راج کندرا کے خلاف سمن جاری کیے تھے۔ یہ کارروائی انفورسمنٹ ڈائریکٹوریٹ (ای ڈی) کی جانب سے داخل کی گئی چارج شیٹ کا نوٹس لیتے ہوئے کی گئی تھی۔ اس معاملے میں دبئی میں مقیم تاجر راجیش ستیجا کو بھی سمن جاری کیے گئے تھے۔ دونوں ملزمان کو 19 جنوری کو عدالت میں پیش ہونے کی ہدایت دی گئی تھی۔ ای ڈی نے ستمبر 2025 میں پی ایم ایل اے کے تحت درج مقدمات کی خصوصی عدالت میں ضمنی چارج شیٹ داخل کر کے راج کندرا اور راجیش ستیجا کو ملزم بنایا تھا۔

کندرا کے پاس 150 کروڑ کے بِٹ کوائن

تحقیقی ایجنسی کے مطابق، بدنام زمانہ ‘گین بِٹ کوائن پونزی گھوٹالے’ کے ماسٹر مائنڈ اور پروموٹر امت بھاردواج سے راج کندرا کو یوکرین میں بِٹ کوائن مائننگ فارم قائم کرنے کے لیے 285 بِٹ کوائن حاصل ہوئے تھے۔ اگرچہ یہ معاہدہ مکمل نہ ہو سکا، تاہم ای ڈی کا دعویٰ ہے کہ 285 بِٹ کوائن اب بھی راج کندرا کے پاس موجود ہیں، جن کی موجودہ قیمت 150 کروڑ روپے سے زائد بتائی جا رہی ہے۔ چارج شیٹ میں کہا گیا ہے کہ شلپا شیٹی کے شوہر راج کندرا نے اس لین دین میں خود کو محض ایک ثالث بتایا، لیکن اپنے دعوے کے حق میں کوئی مضبوط دستاویزی ثبوت پیش نہیں کر سکے۔

ای ڈی کے بڑے دعوے

ای ڈی کے مطابق، ‘ٹرم شیٹ’ کے نام سے ایک معاہدہ راج کندرا اور مہندر بھاردواج کے درمیان ہوا تھا، جس سے یہ واضح ہوتا ہے کہ اصل معاہدہ راج کندرا اور امت بھاردواج (مہندر بھاردواج کے ذریعے) کے درمیان ہی تھا۔ چارج شیٹ میں کہا گیا کہ کندرا کا یہ دعویٰ کہ انہوں نے صرف ثالث کا کردار ادا کیا، قابلِ قبول نہیں ہے۔ تحقیقی ایجنسی نے یہ بھی دعویٰ کیا کہ لین دین کو سات سال سے زیادہ وقت گزرنے کے باوجود راج کندرا کو پانچ مختلف اقساط میں ملنے والے بِٹ کوائنز کی درست تعداد یاد ہے، جس سے یہ ثابت ہوتا ہے کہ وہ بِٹ کوائنز کے اصل فائدہ اٹھانے والے تھے۔