رانچی
نائب صدر سی پی رادھا کرشنن نے جھارکھنڈ کے ضلع کھونٹی کے دورے کے دوران قبائلی ہیرو برسا منڈا کے مجسمے پر خراجِ عقیدت پیش کرنے کے بعد ہفتہ کو کہا کہ ان کی زندگی اور قربانی آج بھی نسلوں کو متاثر کر رہی ہے۔رادھا کرشنن نے اولیہاتو میں اس موقع پر برسا منڈا کے خاندان کے افراد سے بھی ملاقات کی۔
انہوں نے سوشل میڈیا پلیٹ فارم ‘ایکس’ پر لکھا کہ ہندوستان کے نائب صدر کا عہدہ سنبھالنے کے بعد بھگوان برسا منڈا کی مقدس جنم بھومی اولیہاتو کا دوبارہ دورہ کر کے میں بے حد جذباتی ہوں۔انہوں نے کہا کہ میں اس عظیم مجاہدِ آزادی کو خراجِ عقیدت پیش کرتا ہوں، جن کی زندگی اور قربانی آج بھی نسلوں کو تحریک دیتی ہے۔
رادھا کرشنن نے مزید کہا کہ مجھے آج بھی وہ دن یاد ہے جب میں نے جھارکھنڈ کے گورنر کے طور پر حلف لیا تھا۔ اسی دن میں اولیہاتو گیا تھا اور وہ تجربہ آج بھی میرے لیے بہت اہم ہے۔
وہ 2023 سے 2024 کے درمیان جھارکھنڈ کے گورنر بھی رہ چکے ہیں۔انہوں نے کہا کہ وزیرِ اعظم نریندر مودی کی جانب سے 2021 میں برسا منڈا کی یومِ پیدائش 15 نومبر کو “جن جاتیہ گورو دیوس” کے طور پر منانے کے فیصلے سے قبائلی ورثے کے بارے میں قومی سطح پر بیداری اور فخر میں اضافہ ہوا ہے۔
انہوں نے کہا کہ مجھے کھونٹی میں وزیرِ اعظم کے ساتھ اس وقت موجود رہنے کا بھی اعزاز حاصل ہوا تھا جب انہوں نے پی ایم-جن من یوجنا کا اعلان کیا تھا۔ یہ خاص طور پر کمزور قبائلی طبقات کے تحفظ اور بااختیار بنانے کے لیے ایک اہم پہل ہے۔
انہوں نے مزید کہا کہ قبائلی مجاہدینِ آزادی کی شاندار وراثت اور ان کی جدوجہد کے بارے میں نئی نسل میں شعور اور فخر پیدا کرنا، اور ساتھ ہی اس ‘امرت کال’ میں قبائلی برادریوں کو بااختیار بنانا، دراصل ان حقوق اور وقار کی عکاسی کرتا ہے جن کے لیے برسا منڈا نے بہادری سے جدوجہد کی تھی۔
اس سے قبل نائب صدر رانچی ہوائی اڈے پہنچے، جہاں جھارکھنڈ کے گورنر سنتوش گنگوار، مرکزی وزیر سنجے سیٹھ اور ریاستی وزیر سدیویہ کمار نے ان کا استقبال کیا۔وہ دوپہر میں انڈین انسٹی ٹیوٹ آف مینجمنٹ رانچی کے 15ویں کانووکیشن میں شرکت کریں گے اور سات نمایاں طلبہ کو تمغے سے نوازیں گے۔
ادارے کے ایک افسر کے مطابق، اس موقع پر مجموعی کارکردگی کے لیے “اسٹوڈنٹ سٹیزن شپ ایوارڈ” اور “پروفیسر آشیِش ہجیلا ایوارڈ” بھی دیے جائیں گے، جبکہ تقریب کے دوران مجموعی طور پر 558 ڈگری سرٹیفکیٹس تقسیم کیے جائیں گے۔
