پٹنہ

بہار میں شراب بندی قانون کو ناکام بنانے کے لیے اسمگلر کس حد تک جا سکتے ہیں، اس کی ایک حیران کن مثال حاجی پور میں سامنے آئی ہے۔ صدر تھانہ علاقے کے دِگھی مالملا چوڑ میں پولیس نے ایک ایسی ایمبولینس کو پکڑا جسے باہر سے دیکھ کر کسی کو شک نہیں ہو سکتا تھا، لیکن اس کی چھت کے اندر شراب کا پورا “مے خانہ” چھپا ہوا تھا۔

چھت کے خفیہ تہہ خانے نے پولیس کو بھی حیران کر دیا

پولیس کو خفیہ اطلاع ملی تھی کہ ایک ٹاٹا ونگر ایمبولینس کے ذریعے بڑی مقدار میں شراب کی اسمگلنگ کی جا رہی ہے۔ جمعرات کی شام جب پولیس نے گاڑی کو روک کر تلاشی لی تو اوپر سے سب کچھ معمول کے مطابق لگا۔ لیکن ایمبولینس کی چھت کی ساخت کچھ مختلف ہونے کی وجہ سے جب باریکی سے جانچ کی گئی تو چھت سے 1500 بوتلیں برآمد ہوئیں۔ یہ منظر دیکھ کر افسران بھی دنگ رہ گئے۔ اسمگلروں نے چھت میں باقاعدہ ایک خفیہ کیبن تیار کیا تھا تاکہ چیک پوسٹ پر پولیس کو دھوکہ دیا جا سکے۔

مظفرپور کا نکلا مالک، 550 لیٹر شراب ضبط

ایس ڈی پی او سبودھ کمار نے بتایا کہ اس ایمبولینس میں نیچے اور اوپر دونوں جگہ انتہائی چالاکی سے خفیہ خانے بنائے گئے تھے۔ کل 550 لیٹر غیر ملکی شراب برآمد ہوئی ہے۔ پولیس ریکارڈ کے مطابق یہ گاڑی مظفرپور کے منّا کمار کے نام پر رجسٹرڈ ہے۔ پولیس اب اس نیٹ ورک کی دیگر جگہوں تک پہنچنے کی کوشش کر رہی ہے۔

اندھیرے کا فائدہ اٹھا کر ڈرائیور فرار

چھاپے کے دوران ایمبولینس کا ڈرائیور پولیس کو چکما دے کر فرار ہونے میں کامیاب ہو گیا۔ پولیس نے ایمبولینس اور شراب کو ضبط کر لیا ہے اور ملزم ڈرائیور اور گاڑی کے مالک کی گرفتاری کے لیے چھاپے مارنے کا عمل تیز کر دیا ہے۔