پٹنہ: بہار حکومت نے فیصلہ کیا ہے کہ موجودہ تعلیمی سال سے دسویں اور بارہویں جماعت کے بورڈ امتحانات میں ناکام ہونے والے طلبہ کی مارک شیٹ میں ’فیل‘ کی جگہ ’اسکل ٹریننگ کے لیے اہل‘ کا جملہ درج کیا جائے گا۔ حکام نے ہفتہ کو یہ اطلاع دی۔

حکام کے مطابق اس اقدام کا مقصد طلبہ کو بہار بورڈ آف اوپن اسکولنگ اینڈ ایگزامینیشن (BBOSE) کے ذریعے کرائے جانے والے ووکیشنل ٹریننگ پروگراموں میں شامل ہونے کا موقع فراہم کرنا ہے۔ بہار کے وزیر تعلیم متھیلیش تیواری نے صحافیوں سے گفتگو کرتے ہوئے کہا، ’’اس تبدیلی کو نافذ کرنے کے لیے محکمہ تعلیم قواعد میں ترمیم کرے گا۔

محکمہ جلد ہی بہار اسکول ایگزامینیشن بورڈ (BSEB) کو ضروری ہدایات جاری کرے گا۔ سرٹیفکیٹ میں ’فیل‘ کے بجائے ’اسکل ڈیولپمنٹ کے لیے اہل‘ لکھا جائے گا۔‘‘ تیواری نے کہا کہ صرف امتحان میں توقع کے مطابق نمبر حاصل نہ کر پانے سے طلبہ کی صلاحیت ختم نہیں ہوجاتی۔

انہوں نے کہا کہ دسویں جماعت کے بورڈ کے ضمنی امتحانات میں شرکت کرنے والے طلبہ کو ایک ماہ کے خصوصی تعلیمی سیشن فراہم کیے جائیں گے، تاکہ وہ بہتر تیاری کر سکیں اور کامیابی کے امکانات بڑھا سکیں۔ وزیر تعلیم نے کہا کہ یہ اقدام ناکام ہونے والے طلبہ کو اضافی تعلیمی مدد فراہم کرنے اور انہیں تعلیمی طور پر پیچھے رہ جانے سے روکنے کی وسیع تر کوششوں کا حصہ ہے۔

حکام کے مطابق بہار حکومت طلبہ کو روایتی نصابی کتابوں پر مبنی تعلیم کے علاوہ دیگر سرگرمیوں میں زیادہ مواقع فراہم کرنے کے لیے بھی اقدامات کر رہی ہے۔ اسی سلسلے میں ایک حالیہ اقدام کے تحت سرکاری اسکولوں میں ہفتے کے روز ’نو بیگ ڈے‘ شروع کیا گیا ہے۔ 6 اگست کو اعلان کیے گئے انتظام کے مطابق سرکاری اسکول ہفتے کو صبح 9:30 بجے سے دوپہر 1 بجے تک کھلیں گے، جبکہ پیر سے جمعہ تک اسکولوں کا وقت صبح 9:30 بجے سے شام 4 بجے تک رہے گا۔