بھوپال :بھوپال کے سرکاری حمیدیہ اسپتال کے کیمپس میں واقع کملا نہرو اسپتال کی تیسری منزل پر واقع چائلڈ وارڈ (اسپیشل نیوبورن کیئر یونٹ) میں آگ لگنے سے چار بچوں کی دردناک موت ہوگئی اور باقی تقریباً 36 بچوں کو ہنگامی حالات میں دیگر محفوظ مقامات پر منتقل کرکے علاج کیا جا رہا ہے۔
اسپتال ذرائع کے مطابق آگ گزشتہ رات نو بجے کے قریب اسپتال کی تیسری منزل پر واقع انفینٹ وارڈ کے وینٹی لیٹر میں شارٹ سرکٹ کے باعث لگی اور تیزی سے وارڈ کے کچھ حصوں میں پھیل گئی۔ جس سے وارڈ کا سامان جل گیا اور اس میں دھواں پھیل گیا۔
عمارت کے سامنے رات سے جاری چیخ و پکار صبح تک سسکیوں میں بدل گئی۔ اہل خانہ نے سردی میں رات یہاں گزاری۔ صبح سویرے وہ بچوں سے ملنے پہنچ گئے تاہم عمارت کے گیٹ پر پولیس اور پرائیویٹ سکیورٹی تعینات تھی۔ انہیں اندر جانے کی اجازت نہیں تھی۔ صبح 7.30 بجے گھر والوں اور سیکورٹی اہلکاروں کے درمیان ہاتھا پائی ہوئی۔ ہنگامہ بڑھنے پر اہل خانہ کو اندر جانے دیا گیا۔
کملا نہرو اسپتال میں پیر کی رات 9 بجے آگ لگ گئی۔ آگ اسپتال کی تیسری منزل پر واقع چائلڈ وارڈ کے ایس این سی یو میں لگی، جہاں 40 بچے داخل ہیں۔ خیال کیا جا رہا ہے کہ بجلی کی لائن میں شارٹ سرکٹ کے باعث حادثہ پیش آیا اور بچوں کے وینٹی لیٹر میں آگ لگ گئی۔ پھر یہ آگ اس گرم تک پہنچ گئی جس میں بچوں کو رکھا گیا تھا۔ اس سے پہلے کہ کوئی کچھ سمجھتا پورا وارڈ دھوئیں سے بھر گیا۔ حادثے میں چار بچوں کی موت ہو گئی۔
رشتہ داروں نے کہا- بچوں کی موت زیادہ ہے۔ لواحقین کا الزام ہے کہ حکومت اور ہسپتال انتظامیہ موت کے اعداد و شمار چھپا رہی ہے۔ صرف 4 بچے مرے نہیں ہیں۔ اعداد و شمار اس سے زیادہ ہیں۔ اسی لیے انہیں اپنے بچوں سے ملنے کی اجازت نہیں دی جارہی ہے۔ مرنے والے بچوں کے بارے میں بھی یہ تصویر واضح نہیں کہ وہ کس کے ہیں۔ صرف زبانی طور پر موت کی اطلاع دی گئی ہے۔
مدھیہ پردیش کے وزیر اعلی شیوراج سنگھ چوہان نے کہا کہ یہ ایک افسوس ناک واقعہ ہے۔ واقعے کی تحقیقات کا حکم دے دیا گیا ہے۔ یہ مجرمانہ غفلت کا معاملہ ہے۔ قصورواروں کے خلاف سخت کارروائی کی جائے گی۔
