دھار (مدھیہ پردیش): ضلع کلکٹر راجیو رنجن مینا نے جمعہ کو کہا کہ بھوج شالہ معاملے میں سپریم کورٹ کے حکم کی نقل حاصل کرکے اس کا تفصیلی جائزہ لیا جائے گا، جس کے بعد عدالت کی ہدایات کے مطابق ضروری اقدامات کیے جائیں گے تاکہ ضلع میں امن و امان اور فرقہ وارانہ ہم آہنگی برقرار رہے۔ انہوں نے بتایا کہ سپریم کورٹ نے اپنا حکم آج اپنی ویب سائٹ پر جاری کیا ہے۔

ضلعی انتظامیہ پہلے اس کی نقل حاصل کرے گی، پھر اس کا مطالعہ کرکے عدالت کی ہدایات پر عمل درآمد کرے گی۔ امن و امان کے انتظامات سے متعلق سوال پر کلکٹر نے کہا کہ سپریم کورٹ کی تمام ہدایات کو مدنظر رکھتے ہوئے ضروری حفاظتی انتظامات کیے جائیں گے تاکہ دھار میں پرامن ماحول برقرار رہے۔

دوسری جانب بھوج شالہ مکتی یگیہ کے کنوینر گوپال شرما نے سپریم کورٹ کی جانب سے جمعہ کی نماز کے حوالے سے کیے گئے عبوری انتظامات کا خیرمقدم کرتے ہوئے کہا کہ مسلم فریق کو یہ تسلیم کرنا چاہیے کہ بھوج شالہ ایک مندر ہے اور عدالتی عمل کا احترام کرنا چاہیے۔

انہوں نے کہا کہ مدھیہ پردیش ہائی کورٹ کی جانب سے متنازع بھوج شالہ-کمال مولا کمپلیکس کو مندر قرار دیے جانے کے بعد سے وہ روزانہ وہاں پوجا کر رہے ہیں۔ ان کے مطابق عبادت کسی خاص دن تک محدود نہیں بلکہ ہفتے کے ساتوں دن کی جاتی ہے۔ گوپال شرما نے یہ بھی دعویٰ کیا کہ متنازع مقام پر نماز ادا کرنے کا مطالبہ غیر ضروری ہے۔ ان کا کہنا تھا کہ مسلم فریق کو 1942 میں اس مقام کے بدلے ایک مسجد دی جا چکی تھی، اس لیے بار بار اسی مقام پر نماز کی اجازت مانگنے سے شہر کا ماحول خراب ہوتا ہے۔

ادھر جمعہ کے روز بھوج شالہ مندر میں دیوی واگ دیوی کی خصوصی پوجا بھی ادا کی گئی۔ واضح رہے کہ سپریم کورٹ نے منگل کو مسلم فریق کی ان اپیلوں پر مرکز اور مدھیہ پردیش حکومت کو نوٹس جاری کیا تھا، جن میں مدھیہ پردیش ہائی کورٹ کے اس فیصلے کو چیلنج کیا گیا ہے جس میں ضلع دھار کے 11ویں صدی کے بھوج شالہ-کمال مولا کمپلیکس کو دیوی سرسوتی کا مندر قرار دیا گیا تھا۔