بنگلورو۔ پولیس کے مطابق 40 سالہ شخص نے بنگلورو کے ایک ہوٹل میں اپنی 2 کمسن بیٹیوں کو مبینہ طور پر گلا گھونٹ کر قتل کرنے کے بعد خودکشی کی کوشش کی۔ملزم بنگلورو کے شمالی علاقے ناگوارا کا رہائشی ہے۔ اس پر الزام ہے کہ اس نے اپنی 5 اور 10 سالہ بیٹیوں کو قتل کیا۔شمال مشرقی بنگلورو کے ڈپٹی کمشنر آف پولیس جی کے متھن کمار کے مطابق واقعے کا اس وقت علم ہوا جب تاج ہوٹل کے سکیورٹی منیجر نے 2 بچیوں کی مشتبہ موت کے بارے میں پولیس کو اطلاع دی۔

ڈی سی پی متھن کمار نے بتایا کہ پیر کی شام تاج ہوٹل کے سکیورٹی منیجر کی جانب سے 2 بچیوں کی مشتبہ موت کے بارے میں اطلاع موصول ہوئی۔ پولیس موقع پر پہنچی تو بچیوں کے والد پر ان کے قتل کا شبہ ظاہر کیا گیا۔ وہ بھی تشویشناک حالت میں ملا جس کے بعد ہوٹل کی سکیورٹی نے اسے منی پال اسپتال منتقل کیا۔ابتدائی تحقیقات میں سامنے آیا کہ والد نے مبینہ طور پر دونوں بچیوں کا گلا گھونٹ دیا۔ موقع سے ملنے والے ایک خودکشی نوٹ سے گہرے ازدواجی تنازع کی جانب اشارہ ملتا ہے۔

ڈی سی پی نے بتایا کہ نوٹ میں ملزم نے اپنی بیوی کے ساتھ ازدواجی تنازع کا ذکر کیا ہے۔ اسے اپنی بیوی پر شبہ تھا اور اس نے دعویٰ کیا تھا کہ اس کے پاس بیوی کے دوسرے افراد کے ساتھ تعلقات کے ثبوت موجود ہیں۔ پولیس فی الحال اموات کی اصل وجہ کی تصدیق کر رہی ہے۔

پولیس نے قتل کا مقدمہ درج کرلیا ہے اور واقعے کی مکمل تحقیقات کی جارہی ہیں۔پولیس کے مطابق ملزم اس وقت زیر علاج ہے اور اس کی حالت خطرے سے باہر بتائی جارہی ہے۔دہلی میں بھی گھریلو تنازع پر بیوی اور بیٹی پر حملہ

ایک الگ واقعے میں دہلی پولیس نے 4 اگست کو ایک شخص کو اپنی بیوی اور کمسن بیٹی کو مبینہ طور پر چاقو مار کر قتل کرنے کی کوشش کے الزام میں گرفتار کیا تھا۔ یہ واقعہ دہلی کے مانسروور پارک علاقے میں گھریلو تنازع کے بعد پیش آیا تھا۔ پولیس نے حملے میں استعمال کیا گیا مبینہ چاقو بھی برآمد کرلیا تھا۔پولیس کے مطابق واقعے کا علم 1 اگست کو اس وقت ہوا جب مانسروور پارک پولیس اسٹیشن کو گرو تیغ بہادر اسپتال سے اطلاع ملی کہ ایک خاتون اور 15 سالہ لڑکی کو چاقو کے شدید زخموں کے ساتھ اسپتال میں داخل کرایا گیا ہے۔متاثرہ خاتون کی شناخت 38 سالہ پونم کے طور پر ہوئی جبکہ زخمی لڑکی ان کی بیٹی ہے۔