نئی دہلی: مرکزی تفتیشی بیورو (سی بی آئی) نے مغربی بنگال کے وزیر اعلیٰ شوبھیندو ادھیکاری کے قریبی ساتھی چندرناتھ رتھ کے مبینہ قتل کے معاملے میں ایف آئی آر درج کرکے ریاستی پولیس سے تحقیقات اپنے ہاتھ میں لے لی ہیں۔ حکام نے پیر کو یہ اطلاع دی۔

حکام کے مطابق، ریاستی حکومت کی درخواست پر سی بی آئی نے اس کیس کی جانچ سنبھالی ہے۔ طریقۂ کار کے مطابق، سی بی آئی ریاستی پولیس کی ایف آئی آر کو اپنے مقدمے کے طور پر دوبارہ درج کرتی ہے، جو تحقیقات کا ابتدائی نقطہ بنتا ہے، اور پھر آزادانہ طور پر تفتیش کی جاتی ہے۔ اس کے بعد سی بی آئی مجاز عدالت میں اپنی حتمی رپورٹ پیش کرتی ہے، جو تحقیقات کے نتائج کی بنیاد پر چارج شیٹ یا مقدمہ بند کرنے کی درخواست ہوسکتی ہے۔

مغربی بنگال پولیس نے رتھ قتل کیس میں پیر کو اتر پردیش اور بہار سے تین افراد کو گرفتار کیا۔ یہ گرفتاریاں ایک مشتبہ شخص کی جانب سے ٹول پلازہ پر کیے گئے یو پی آئی لین دین سے ملنے والے سراغ کی بنیاد پر کی گئیں۔ شوبھیندو کے ایگزیکٹو اسسٹنٹ رتھ کو مغربی بنگال اسمبلی انتخابات کے نتائج کے اعلان کے دو دن بعد، 6 مئی کو مدھیام گرام میں قتل کردیا گیا تھا۔

تینوں ملزمان کو اتوار کو حراست میں لیا گیا اور قتل کیس کی تحقیقات کے لیے تشکیل دی گئی خصوصی تحقیقاتی ٹیم (ایس آئی ٹی) نے اگلی صبح انہیں باضابطہ طور پر گرفتار کرلیا۔ تکنیکی نگرانی، ڈیجیٹل ٹریکنگ اور دیگر معلومات کی بنیاد پر ایس آئی ٹی کے ارکان کو اتر پردیش اور بہار بھیجا گیا تھا۔

ایک افسر نے بتایا کہ تحقیقات کے دوران یہ بات سامنے آئی کہ حملہ آوروں کی استعمال کردہ مشتبہ گاڑی قتل سے پہلے بَلی ٹول پلازہ سے گزری تھی۔ گاڑی میں سوار ایک شخص نے مبینہ طور پر یو پی آئی کے ذریعے ٹول ٹیکس ادا کیا تھا۔ انہوں نے بتایا کہ تینوں پر بھارتیہ نیائے سنہتا (بی این ایس) کی مختلف دفعات کے تحت قتل، غیر قانونی اسلحہ رکھنے، مجرمانہ سازش رچنے اور ثبوت مٹانے کے الزامات عائد کیے گئے ہیں۔

ایک سینئر پولیس افسر کے مطابق، “دو ملزمان مایانک راج مشرا اور وکی موریہ کو بہار کے بکسر سے حراست میں لیا گیا، جبکہ تیسرے ملزم راج سنگھ کو اتر پردیش کے بلیا سے پکڑا گیا۔ پوچھ گچھ کے بعد تینوں کو آج صبح گرفتار کرلیا گیا۔” اس سے قبل پولیس نے غلطی سے وکی موریہ کی شناخت وشال شریواستو کے طور پر کی تھی اور یہ دعویٰ بھی کیا تھا کہ تینوں کو اتر پردیش سے گرفتار کیا گیا ہے۔ حکام کے مطابق، قتل کی سازش اور اس پر عمل درآمد میں کم از کم آٹھ افراد شامل تھے۔