کولکتہ:ممتا بنرجی کے استعفیٰ دینے سے انکار کے بعد گورنر نے مغربی بنگال کی کابینہ تحلیل کر دی۔ بنگال کے انتخابات میں بھاری شکست کے بعد ممتا بنرجی نے وزیر اعلیٰ کے عہدے سے استعفیٰ دینے سے انکار کر دیا تھا، جس کے بعد گورنر نے یہ فیصلہ لیا۔ یہ پورا فیصلہ آئینی عمل کے تحت کیا گیا ہے۔

ترنمول کانگریس کی سربراہ ممتا بنرجی نے منگل (6 مئی 2026) کو وزیر اعلیٰ کے عہدے سے استعفیٰ دینے سے انکار کیا اور الزام لگایا کہ مغربی بنگال اسمبلی انتخابات کا نتیجہ “عوامی مینڈیٹ نہیں بلکہ ایک سازش” ہے۔ ساتھ ہی انہوں نے سڑکوں پر اتر کر جدوجہد کرنے اور اپوزیشن کے ‘انڈیا’ اتحاد کو مضبوط کرنے کا عزم ظاہر کیا۔

ممتا بنرجی نے یہ بھی الزام لگایا کہ ترنمول کانگریس نے بی جے پی کے خلاف الیکشن نہیں لڑا بلکہ اس کی لڑائی الیکشن کمیشن سے تھی، جس نے بی جے پی کے لیے کام کیا۔ انہوں نے کہا، “میرے استعفے کا سوال ہی پیدا نہیں ہوتا کیونکہ ہماری شکست عوامی مینڈیٹ سے نہیں بلکہ ایک سازش کے تحت ہوئی ہے۔ میں ہاری نہیں ہوں، میں راج بھون نہیں جاؤں گی۔ تقریباً 100 نشستوں پر مینڈیٹ کو لوٹ لیا گیا اور ان کی پارٹی کا حوصلہ توڑنے کے لیے جان بوجھ کر ووٹوں کی گنتی سست کی گئی۔