نئی دہلی

دہلی-این سی آر میں تجارتی گاڑیاں چلانے والوں نے 21 سے 23 مئی تک تین روزہ ہڑتال کا اعلان کیا ہے۔

اُن کا مطالبہ ہے کہ ایندھن کی بڑھتی ہوئی قیمتوں اور ایپ پر مبنی کیب خدمات فراہم کرنے والی کمپنیوں کی جانب سے مبینہ معاشی استحصال کے پیشِ نظر ٹیکسی اور آٹو کے کرایوں میں فوری ترمیم کی جائے۔’’چالک شکتی یونین‘‘ کی جانب سے دہلی کے لیفٹیننٹ گورنر، وزیرِ اعلیٰ، وزیرِ ٹرانسپورٹ اور پولیس کمشنر کو دیے گئے خط کے مطابق یہ ہڑتال ’’آل انڈیا موٹر ٹرانسپورٹ کانگریس‘‘ کی جانب سے اعلان کردہ ملک گیر احتجاج کی حمایت میں کی جا رہی ہے۔ یونین نے کہا کہ دہلی-این سی آر میں گزشتہ تقریباً 15 برسوں سے ٹیکسی کے کرایوں میں کوئی تبدیلی نہیں کی گئی، جبکہ سی این جی، پٹرول اور ڈیزل کی قیمتوں میں زبردست اضافہ ہو چکا ہے۔ اس کے ساتھ گاڑیوں کی دیکھ بھال، بیمہ، فٹنس سرٹیفکیٹ، پرمٹ اور روزمرہ کی دیگر ضروریات کے اخراجات بھی مسلسل بڑھتے جا رہے ہیں۔

یونین کا الزام ہے کہ دہلی-این سی آر کے ٹیکسی ڈرائیور شدید معاشی بحران کا سامنا کر رہے ہیں اور اپنے خاندانوں کی کفالت کے لیے جدوجہد پر مجبور ہیں۔خط میں کہا گیا ہے کہ مہنگائی میں مسلسل اضافے کے باوجود ٹیکسی کا کرایہ اب بھی پرانی شرحوں کے مطابق وصول کیا جا رہا ہے، جس کے باعث ڈرائیوروں کے روزگار پر نہایت منفی اثرات مرتب ہوئے ہیں۔

ڈرائیوروں کی اس تنظیم نے اولا، اوبر اور ریپیڈو جیسی ایپ پر مبنی کیب کمپنیوں پر بھی من مانی اور معاشی استحصال کا الزام عائد کیا ہے۔یونین نے کہا کہ اولا، اوبر اور ریپیڈو جیسی ایپ پر مبنی کمپنیاں اپنی مرضی کے مطابق کام کر رہی ہیں اور دہلی-این سی آر میں ڈرائیور شدید معاشی استحصال کا شکار بن رہے ہیں۔

یونین نے خبردار کیا کہ اگر دہلی حکومت نے فوری طور پر کرایوں میں تبدیلی نہ کی تو یہ احتجاجی تحریک مزید شدت اختیار کر سکتی ہے۔یونین نے حکومت سے مطالبہ کیا ہے کہ ڈرائیوروں کے مسائل پر گفتگو اور ٹیکسی ڈرائیوروں کے مبینہ معاشی استحصال کو روکنے کے لیے پالیسی سازی کے مقصد سے ایک اجلاس بلایا جائے۔

ادھر آج پورے ملک میں ایندھن کی قیمتوں میں اضافہ دیکھا گیا، کیونکہ پٹرول اور ڈیزل کی قیمتوں میں اوسطاً 90 پیسے فی لیٹر اضافہ کیا گیا۔

دہلی میں پٹرول کی قیمت 87 پیسے بڑھ کر 97.77 روپے سے 98.64 روپے فی لیٹر ہو گئی، جبکہ ڈیزل کی قیمت 91 پیسے بڑھ کر 90.67 روپے سے 91.58 روپے فی لیٹر تک پہنچ گئی۔