گانگٹوک
وزیرِ اعظم نریندر مودی نے منگل کے روز کہا کہ سکم اس وقت "ایک ہندوستان، بہترین ہندوستان" کے وژن کی عکاسی کر رہا ہے، جب ملک کو زبان، علاقائیت اور سماجی بنیادوں پر تقسیم کرنے کی کوششیں کی جا رہی ہیں۔گانگٹوک کے پالجور اسٹیڈیم میں سکم کے قیام کے 50 سال مکمل ہونے کی تقریبات سے خطاب کرتے ہوئے وزیرِ اعظم نے کہا کہ کچھ عناصر زبان، علاقائیت اور سماجی درجہ بندی کی بنیاد پر ملک کو تقسیم کرنے کی کوشش کر رہے ہیں، جبکہ اس موقع پر فنکاروں نے ہندوستان کی یکجہتی اور تنوع کو خوبصورتی سے پیش کیا۔
انہوں نے ثقافتی پروگرام پیش کرنے والے فنکاروں اور کوریوگرافرز کو مبارکباد دیتے ہوئے کہا کہ آج ہم سکم کے 50 سال کا جشن منا رہے ہیں۔ جب کوئی موقع تاریخی ہو اور ایسے روحانی ماحول میں منعقد ہو، تو اس کی شان کئی گنا بڑھ جاتی ہے۔ یہ اسٹیڈیم اسی خوبصورت فضا سے بھرا ہوا ہے۔ میں فنکاروں اور کوریوگرافرز کو مبارکباد دیتا ہوں اور میڈیا سے درخواست کرتا ہوں کہ اس پروگرام کو بار بار دکھایا جائے۔
انہوں نے مزید کہا کہ سیاسی مفادات کے تحت جب ملک میں لسانی تعصب، علاقائیت اور سماجی تقسیم کو ہوا دینے کی کوششیں ہو رہی ہیں، ایسے وقت میں سکم نے 'ایک ہندوستان، بہترین ہندوستان' کے وژن کی حقیقی جھلک پیش کی ہے۔ اس چھوٹے سے پروگرام میں ملک کے تنوع اور اتحاد کو نہایت خوبصورتی سے دکھایا گیا۔سکم کی خوبصورتی کی تعریف کرتے ہوئے وزیرِ اعظم نے اسے "مشرق کا فخر" قرار دیا۔
انہوں نے کہا کہ گزشتہ رات کی بارش اور آج کی دھوپ، سکم کے رنگ واقعی منفرد ہیں۔ مشرق کا فخر سکم، سکم آرکڈز کا باغ ہے۔ یہاں کی بے مثال خوبصورتی، سکون اور روحانی کیفیت ایک خاص نعمت ہے، جو نصیب والوں کو ہی حاصل ہوتی ہے۔
انہوں نے مزید کہا کہ پچھلی بار خراب موسم کی وجہ سے میں یہاں نہیں آ سکا تھا اور آن لائن جڑنا پڑا تھا۔ میرے دل میں یہاں آنے کی خواہش باقی رہ گئی تھی۔ جب بھی میں پریم سنگھ جی سے ملتا تھا، مجھے افسوس ہوتا تھا۔ آج وہ انتظار ختم ہو گیا۔اپنے دو روزہ دورے کے دوران وزیرِ اعظم نے سکم کے آرکڈز اور لوگوں کی صفائی پسندی کی تعریف کی اور سیاحوں سے اپیل کی کہ وہ اس سال بڑی تعداد میں سکم کا دورہ کریں۔
انہوں نے کہا کہ میں نے آرکڈ باغ کا بھی دورہ کیا اور اپنے طے شدہ وقت سے زیادہ وقت وہاں گزارا۔ قدرت سے محبت کرنے والے سیاحوں سے کہوں گا کہ اگر آپ نے سکم کے آرکڈز نہیں دیکھے تو کچھ نہیں دیکھا۔ مجھے یقین ہے کہ اس بار سکم سیاحت کے تمام ریکارڈ توڑ دے گا۔ وہاں کے رنگ اور خوبصورتی نے مجھے مسحور کر دیا ہے اور میرا دل اب بھی وہیں ہے۔
انہوں نے پیر کے روز اپنے روڈ شو کو یاد کرتے ہوئے کہا کہ میرے روڈ شو کے دوران سب سے اچھی بات سکم کی سڑکوں کی صفائی تھی۔ میں آپ سب کو سلام پیش کرتا ہوں۔ سکم کے لوگ قدرت کے حقیقی نمائندے ہیں، اسی لیے میں ملک کے لوگوں سے اپیل کرتا ہوں کہ وہ سکم ضرور آئیں۔اس سے قبل، وزیرِ اعظم نے سکم کے 50 سال مکمل ہونے کی تقریبات کی اختتامی تقریب میں 4,000 کروڑ روپے سے زائد مالیت کے متعدد ترقیاتی منصوبوں کا افتتاح اور سنگِ بنیاد بھی رکھا۔
وزیرِ اعظم کے دفتر کے بیان کے مطابق، یہ منصوبے بنیادی ڈھانچہ، رابطہ کاری، صحت، تعلیم، بجلی، شہری ترقی، ماحولیات، سیاحت اور زراعت جیسے مختلف شعبوں سے متعلق ہیں، جن کا مقصد سکم میں ہمہ جہت اور شمولیتی ترقی کو فروغ دینا ہے
