سلچر:آسام رائفلز نے سلچر میں کسٹمز محکمہ کے ساتھ مشترکہ کارروائی کے دوران منگل کے روز ایک گودام سے جعلی سگریٹ برآمد کیے جن کی مالیت 34 لاکھ روپے بتائی گئی ہے۔آسام رائفلز کے بیان کے مطابق یہ کھیپ سلچر کے راستے ریاست میں مزید تقسیم کے لیے لے جائی جا رہی تھی۔

آسام رائفلز نے کہا کہ وہ کسٹمز محکمہ کے ساتھ مل کر خطے میں جعلی اشیا کے خلاف کارروائیوں میں پیش پیش رہی ہے۔ فورس نے بتایا کہ جعلی نیٹ ورک کو توڑنے اور ختم کرنے کے لیے باقاعدہ مہمات چلائی جا رہی ہیں۔فورس نے مزید کہا کہ یہ ضبطی جعلی اشیا کی اسمگلنگ کے خلاف جاری کوششوں میں ایک اہم سنگ میل ہے۔

اس سے قبل آسام رائفلز نے میزورم میں 11.062 کلو میتھ ایمفیٹامین گولیاں برآمد کی تھیں۔ یہ ایک نفسیاتی اثر رکھنے والا مادہ ہے جس کی بین الاقوامی منڈی میں مالیت 33.186 کروڑ روپے بتائی گئی ہے۔سرکاری پریس ریلیز کے مطابق ہندستان میانمار سرحد کے قریب منشیات کی اسمگلنگ سے متعلق مستند خفیہ اطلاعات کی بنیاد پر آسام رائفلز نے میزورم پولیس کے ساتھ سیتول ضلع کے کیفانگ علاقے میں مشترکہ کارروائی کی۔

کارروائی کے دوران مشتبہ مقام کے قریب غیر معمولی نقل و حرکت دیکھی گئی۔ بعد ازاں فوری اور مکمل تلاشی کے نتیجے میں 11.062 کلو میتھ ایمفیٹامین گولیاں برآمد ہوئیں۔ ضبط شدہ منشیات اور ایک گاڑی کو تفصیلی تفتیش اور قانونی کارروائی کے لیے میزورم پولیس سیتول کے حوالے کر دیا گیا۔