گوہاٹی: آسام میں سیلاب کی صورت حال بدستور تشویش ناک ہے۔ گزشتہ 24 گھنٹوں کے دوران مزید چھ افراد جان کی بازی ہار گئے، جس کے بعد رواں مانسون موسم میں سیلاب سے ہونے والی مجموعی ہلاکتوں کی تعداد بڑھ کر 95 ہوگئی ہے۔ڈیزاسٹر رپورٹنگ اینڈ انفارمیشن مینجمنٹ سسٹم کی تازہ رپورٹ کے مطابق ریاست کے متعدد اضلاع میں دیہی علاقوں میں وسیع پیمانے پر سیلاب اور شہری علاقوں میں شدید آبی جماؤ کی صورت حال برقرار ہے۔

بدھ کو رپورٹ ہونے والی چھ نئی ہلاکتوں میں سے پانچ عام سیلابی صورت حال کے باعث ہوئیں۔ ان میں دو دو اموات بسواناتھ اور شیوساگر اضلاع میں جبکہ ایک موت گولاگھاٹ ضلع میں ہوئی۔ اس کے علاوہ موریگاؤں ضلع کے مایونگ ریونیو سرکل میں شہری سیلاب کے باعث ایک شخص ہلاک ہوا۔ ادلگڑی ضلع میں ایک شخص لاپتا بھی بتایا گیا ہے۔نومالی گڑھ کے مقام پر دھانسری جنوبی دریا اب بھی خطرے کی سطح سے اوپر بہہ رہا ہے، جس کے باعث 14 اضلاع میں ہائی الرٹ جاری ہے۔ متاثرہ اضلاع میں گولاگھاٹ، لکھیم پور، چرائدیو، شیوساگر، بسواناتھ، دھیمجی، کامروپ میٹرو، جورہاٹ، سونیت پور، تنسوکیا، ناگاؤں، درنگ، کاربی آنگ لانگ اور ادلگڑی شامل ہیں۔

رپورٹ کے مطابق موجودہ سیلابی لہر سے 563 دیہات کے ایک لاکھ 60 ہزار سے زائد افراد متاثر ہوئے ہیں۔ شیوساگر سب سے زیادہ متاثرہ ضلع ہے جہاں 57 ہزار سے زیادہ افراد سیلاب سے متاثر ہوئے ہیں، جبکہ گولاگھاٹ اور جورہاٹ بھی شدید متاثرہ اضلاع میں شامل ہیں۔سیلاب نے ریاست کے بنیادی ڈھانچے کو بھی بڑے پیمانے پر نقصان پہنچایا ہے۔ رپورٹ کے مطابق سات بڑے بند ٹوٹ چکے ہیں، جن میں بسواناتھ کے برہماجان علاقے میں پانچ اور درنگ کے منگل دوئی میں دو بند شامل ہیں۔ چرائدیو کے چولاپتھر میں ایک فولادی پل اور ادلگڑی کے تانگلا علاقے میں ایک پیدل پل بھی نقصان کا شکار ہوئے ہیں۔

ریاست میں 16,951 ہیکٹر زرعی رقبہ زیر آب آچکا ہے۔ مویشیوں کو بھی بھاری نقصان پہنچا ہے۔ 35 ہزار سے زائد جانور متاثر ہوئے ہیں جبکہ تقریباً 8,500 مویشی، جن میں زیادہ تر شیوساگر کے ہیں، سیلابی ریلے میں بہہ گئے۔گوہاٹی سمیت کئی شہری علاقوں میں بھی شدید آبی جماؤ برقرار ہے۔ کامروپ، کامروپ میٹرو، موریگاؤں اور جورہاٹ اضلاع میں شہری سیلاب سے 734 افراد متاثر ہوئے ہیں۔ کامروپ میٹرو میں ریاستی آفات سے نمٹنے والی فورس اور ضلعی آفات سے نمٹنے والی فورس نے کشتیوں کے ذریعے ستگاؤں اور ہاتھی گاؤں سمیت زیر آب علاقوں سے 80 افراد کو محفوظ مقامات پر منتقل کیا۔ گوہاٹی کے جوری پار اور انیل نگر علاقوں میں اب بھی جزوی آبی جماؤ کے باعث معمولات زندگی متاثر ہیں۔

ریاستی حکومت نے امدادی کارروائیاں تیز کرتے ہوئے 45 امدادی کیمپ قائم کیے ہیں، جہاں اس وقت 12,356 افراد مقیم ہیں۔ اس کے علاوہ 59 امدادی تقسیم مراکز کے ذریعے 32 ہزار سے زیادہ متاثرین کو ضروری اشیائے خور و نوش فراہم کی جا رہی ہیں۔ شدید متاثرہ علاقوں میں بڑی مقدار میں چاول، دال، نمک اور مویشیوں کی خوراک بھی بھیجی جا رہی ہے۔ادھر محکمہ موسمیات نے دریاؤں کے بالائی علاقوں میں مزید بارش کی پیش گوئی کی ہے، جس کے پیش نظر حکام مسلسل دریاؤں کی سطح کی نگرانی کر رہے ہیں، کیونکہ مزید بارش سے سیلابی صورت حال مزید سنگین ہونے کا خدشہ ہے۔