گوہاٹی 

آسام کرائم برانچ نے منگل کے روز کانگریس کے سینئر رہنما رندیپ سرجے والا کو 23 مئی کو تفتیشی افسران کے سامنے پیش ہونے کے لیے سمن جاری کیا ہے۔ یہ سمن آسام کے وزیرِ اعلیٰ ہمنتا بسوا سرما کی اہلیہ رنکی بھوئیاں سرما سے متعلق پاسپورٹ تنازع کے سلسلے میں جاری کیا گیا ہے۔یہ پیش رفت کانگریس کے ایک اور رہنما پون کھیڑا کو اسی ہائی پروفائل معاملے میں گوہاٹی واقع کرائم برانچ پولیس اسٹیشن طلب کیے جانے کے چند روز بعد سامنے آئی ہے۔

پیشی کے بعد کانگریس رہنما پون کھیڑا نے کہا کہ انہوں نے تفتیشی حکام کے ساتھ مکمل تعاون کیا ہے اور تصدیق کی کہ وہ جاری تحقیقات کے سلسلے میں 25 مئی کو دوبارہ ایجنسی کے سامنے پیش ہوں گے۔

گوہاٹی میں صحافیوں سے گفتگو کرتے ہوئے پون کھیڑا نے کہا کہ ان سے وہ تمام سوالات پوچھے گئے جو عام طور پر کسی تفتیش کے دوران کیے جاتے ہیں، اور انہوں نے اس بات پر زور دیا کہ ہر ذمہ دار شہری کو تحقیقاتی ایجنسیوں کے ساتھ تعاون کرنا چاہیے۔انہوں نے کہا کہ مجھ سے وہ تمام سوالات پوچھے گئے جو عام طور پر تفتیش کے دوران کیے جاتے ہیں۔ مجھے اگلی مرتبہ 25 مئی کو طلب کیا گیا ہے۔ میں دوبارہ آؤں گا کیونکہ ہر ذمہ دار شہری کو تحقیقات میں تعاون کرنا چاہیے۔

جب ان سے پوچھا گیا کہ کیا وہ آسام کے وزیرِ اعلیٰ ہمنتا بسوا سرما کی اہلیہ رنکی بھوئیاں سرما سے متعلق اپنے سابقہ دعووں پر قائم ہیں، تو کانگریس رہنما نے تفصیل سے جواب دینے سے گریز کیا اور کہا کہ وہ اپنی گفتگو کو صرف تفتیشی عمل تک محدود رکھیں گے۔

یہ تنازع اُس وقت شروع ہوا جب کانگریس رہنما پون کھیڑا نے اپریل میں ایک پریس کانفرنس کے دوران الزام عائد کیا تھا کہ وزیرِ اعلیٰ سرما کی اہلیہ رنکی بھوئیاں سرما کے پاس ہندوستان، متحدہ عرب امارات اور مصر کے تین پاسپورٹ ہیں، جبکہ دبئی میں ان کی غیر ظاہر شدہ پُرتعیش جائیدادیں بھی موجود ہیں۔ انہوں نے یہ بھی دعویٰ کیا تھا کہ امریکہ کی ریاست وائیومنگ میں ان کی ایک کمپنی ہے۔

سرما خاندان نے ان تمام دعووں کو مکمل طور پر مسترد کرتے ہوئے ان دستاویزات کو ’’مصنوعی ذہانت سے تیار کردہ من گھڑت مواد‘‘ قرار دیا، جسے پاکستانی سوشل میڈیا گروپس کی جانب سے پھیلایا جا رہا ہے۔ان الزامات کے جواب میں وزیرِ اعلیٰ ہمنتا بسوا سرما نے پہلے سخت کارروائی کا انتباہ دیتے ہوئے کہا تھا، ’’کوئی بھی الزام لگانے سے پہلے انہیں وزیرِ خارجہ سے پوچھ لینا چاہیے تھا۔ کھرگے جی عمر رسیدہ ہو چکے ہیں، پھر بھی دیوانوں جیسی باتیں کرتے ہیں۔ آسام پولیس لوگوں کو ’پاتال‘ سے بھی ڈھونڈ کر لا سکتی ہے۔ مجھے شبہ ہے کہ راہل گاندھی نے ہی انہیں یہ دستاویزات فراہم کی ہیں، اس لیے یہ معاملہ راہل گاندھی تک بھی جائے گا۔ ہمیں ڈرانے کی کوشش نہ کریں۔ یہ آسام ہے، اور ہم نے 17 مرتبہ اسلامی حملہ آوروں کے خلاف جنگ لڑی ہے۔

وزیرِ اعلیٰ سرما نے یہ دعویٰ بھی کیا کہ تلاشی کی کارروائی کے بعد پون کھیڑا ’’بھاگ کر‘‘ حیدرآباد چلے گئے تھے۔انہوں نے مزید کہا کہ مجھے ذرائع ابلاغ کے ذریعے معلوم ہوا ہے کہ پولیس ان کی دہلی رہائش گاہ پر گئی تھی، لیکن وہ بھاگ کر حیدرآباد چلے گئے۔ قانون اپنا کام کرے گا۔