نئی دہلی/ آواز دی وائس

آسام کے وزیرِ اعلیٰ ہمنت بسوا سرما نے پیر کے روز یہاں مرکزی وزیرِ خزانہ نرملا سیتارمن سے ملاقات کی، جس میں ریاست کی ترقی اور عوامی فلاح و بہبود سے متعلق اہم امور پر تبادلۂ خیال کیا گیا۔

ایک جاری بیان کے مطابق، اس ملاقات کے دوران آسام کی اقتصادی ترقی، بنیادی ڈھانچے کی تعمیر اور عوامی فلاحی اقدامات سے جڑے متعدد معاملات پر گفتگو ہوئی۔ بات چیت میں مرکز اور ریاست کے درمیان تعاون کو مزید مضبوط بنانے پر زور دیا گیا تاکہ آسام کی ترقی کی رفتار کو تیز کیا جا سکے۔ وزیرِ اعلیٰ نے آسام کی ترقی کے ایجنڈے کو آگے بڑھانے میں مسلسل تعاون اور رہنمائی پر مرکزی وزیرِ خزانہ کا شکریہ ادا کیا اور ریاست کے عوام کی مجموعی ترقی اور خوشحالی کے لیے مرکزی حکومت کے ساتھ قریبی اشتراک کے عزم کا اعادہ کیا۔

بعد ازاں، ایکس (سابقہ ٹوئٹر) پر ایک پوسٹ میں وزیرِ اعلیٰ سرما نے لکھا کہ آج نئی دہلی میں معزز مرکزی وزیرِ خزانہ  سے ملاقات کر کے اعزاز محسوس ہوا۔ ہم نے آسام کی ترقی اور ہمارے عوام کی فلاح و بہبود سے متعلق کئی امور پر تبادلۂ خیال کیا۔

وزیرِ اعلیٰ نے مزید کہا کہ میں نے ہماری ترقی کے سفر میں مسلسل تعاون پر معزز وزیر کا شکریہ ادا کیا۔ اس سے قبل اتوار کے روز، وزیرِ اعلیٰ سرما نے قومی دارالحکومت میں ہندوستان کے نائب صدر سی پی رادھا کرشنن سے خیرسگالی ملاقات کی۔نائب صدر کی رہائش گاہ پر ہونے والی اس ملاقات کے دوران وزیرِ اعلیٰ نے ذاتی طور پر رادھا کرشنن کو نائب صدر کے عہدے کا منصب سنبھالنے پر مبارکباد دی۔ ساتھ ہی انہوں نے نائب صدر کو آسام کا دورہ کرنے کی باضابطہ دعوت دی تاکہ وہ ریاست میں ہونے والی تبدیلیوں اور حالیہ ترقیاتی پیش رفت کا مشاہدہ کر سکیں۔

ایک بیان کے مطابق، نائب صدر نے اس خیرسگالی اقدام کو سراہا اور تقریباً 30 منٹ تک جاری رہنے والی ملاقات میں وزیرِ اعلیٰ سے گرمجوشی کے ساتھ بات چیت کی۔ایکس پر ایک اور پوسٹ میں وزیرِ اعلیٰ سرما نے کہا کہ آج نئی دہلی میں معزز نائب صدرِ ہندوستان، شری سی پی رادھا کرشنن جی سے ملاقات کر کے اعزاز محسوس ہوا۔  انہوں نے مزید لکھاکہ میں نے انہیں کے معزز منصب کی ذمہ داری سنبھالنے پر ذاتی طور پر مبارکباد دی اور آسام کا دورہ کرنے کی دعوت دی تاکہ وہ حالیہ برسوں میں ریاست میں آنے والی تبدیلیوں کو دیکھ سکیں۔