گوہاٹی :آسام میں غیر قانونی مدارس کے خلاف حکومت کی بلڈوزر کارروائی جاری ہے۔ بدھ کو ہی بونگائی گاؤں ضلع میں واقع ایک مدرسہ کو منہدم کر دیا گیا۔ خاص بات یہ ہے کہ برصغیر میں القاعدہ اور انصار اللہ بنگلہ ٹیم سے تعلق رکھنے والے 37 افراد کی گرفتاری کے بعد یہ تیسرا مدرسہ ہے جسے آسام حکومت نے منہدم کیا ہے۔ اس سے پہلے پیر کو حکومت نے بارپیٹا ضلع میں ایسی کارروائی کی تھی۔

ریاست کے بونگائیگاؤں ضلع میں واقع مرجع المعارف قریانہ مدرسہ کو منہدم کردیا گیا۔ خبر رساں ایجنسی اے این آئی سے بات کرتے ہوئے، ایس پی سوپنل ڈیکا نے کہا، 'ضلع انتظامیہ نے اپنے ایک حکم میں کہا ہے کہ مدرسہ کا ڈھانچہ کمزور ہے اور انسانوں کے لیے محفوظ نہیں ہے، کیونکہ مدرسہ کی عمارت  شہری  اصولوں کے مطابق نہیں بنائی گئی تھی۔

انہوں نے کہا، 'کل گوپال پورہ پولیس نے القاعدہ  سے تعلق رکھنے کے الزام میں گرفتار شخص کے ساتھ مدرسہ میں تلاشی لی۔ ضلعی انتظامیہ کے حکم کے مطابق ہم مدرسہ کو گرانے کا عمل شروع کر رہے ہیں۔

اس مدرسے کا تعلق حفیظ الرحمن سے بتایا جاتا ہے، جسے گزشتہ ہفتے القاعدہ سلیپر سیل ماڈیول سے وابستہ مشتبہ دہشت گرد کے طور پر گرفتار کیا گیا تھا۔ حکومتی ذرائع کے مطابق مدرسے کو راتوں رات خالی کر دیا گیا، طلباء کو دوسرے ادارے میں منتقل کیا جائے گا۔ اسی دوران پولیس کے ایک ذریعے نے بتایا کہ سرچ آپریشن کے دوران کالعدم شدت پسند گروپوں سے متعلق دستاویزات ملی ہیں۔

آپ کو بتادیں کہ اس سے قبل ضلع بارپیٹا میں ایک مدرسہ جس نے انصار اللہ بنگلہ ٹیم (اے بی ٹی) کے دو بنگلہ دیشی ارکان کو چار سال سے پناہ دی تھی، پیر کو ضلعی انتظامیہ نے منہدم کر دیا تھا۔ سیف الاسلام کو اس سال کے شروع میں دہشت گردوں سے روابط کے الزام میں گرفتار کیا گیا تھا، جب کہ دوسرے کی تلاش جاری ہے۔

دہشت گردوں کے دونوں ساتھیوں کو ان کی غیر قانونی سرگرمیوں میں مدد کرنے کے الزام میں ہیڈ ماسٹر، ایک استاد اور ایک اور شخص کو پہلے بھی گرفتار کیا جا چکا ہے۔ بارپیٹا کے سپرنٹنڈنٹ آف پولیس امیتابھ سنہا نے کہا تھا، "چونکہ یہ مدرسہ سرکاری زمین پر بنایا گیا تھا، اس لیے بارپیٹا ضلع انتظامیہ کی جانب سے بے دخلی مہم میں اسے منہدم کردیا گیا۔ امن و امان برقرار رکھنے کے لیے پولیس اہلکاروں کو تعینات کیا گیا تھا۔

#WATCH | Assam: Markazul Ma-Arif Quariayana Madrasa, located at Kabaitary Part-IV village in Bongaigaon district, being demolished

This is the 3rd Madrasa demolished by the Assam government following arrests of 37 persons including Imam and Madrasa teachers linked with AQIS/ABT pic.twitter.com/zTQiiicAne

— ANI (@ANI) August 31, 2022

پیر کو بارپیٹا میں کی گئی کارروائی کے بعد ایک سینئر پولیس افسر کا کہنا ہے کہ کمپلیکس کو دہشت گردانہ سرگرمیوں کے لیے استعمال کیا جا رہا تھا۔ اس دوران ڈھاکلی پارہ مدرسہ کو منہدم کر دیا گیا۔ اس کے علاوہ، دو بھائیوں اکبر علی اور ابوالکلام آزاد کو القاعدہ سے روابط رکھنے پر گرفتار کیا گیا۔

آسام حکومت نے سب سے پہلے موریگاؤں کے مدرسے پر 4 اگست کو کارروائی کی۔ اس ماہ کے شروع میں، ریاست کے وزیر اعلیٰ ہمانتا بسوا سرما نے کہا تھا کہ ریاست اسلامی بنیاد پرستی کا گڑھ بن رہی ہے۔ ساتھ ہی انہوں نے بتایا تھا کہ سیکورٹی فورسز نے مارچ سے اب تک 5 جہادی ماڈیولز کا پردہ فاش کیا ہے۔