تہران

پاکستانی فوج کے سربراہ جنرل عاصم منیر جمعرات کو تہران کا دورہ کرنے کا امکان رکھتے ہیں، جہاں امن مذاکرات کے سلسلے میں مشاورت کا عمل جاری ہے۔ یہ اطلاع ایرانی خبر رساں ایجنسی آئی ایس این اے نے دی ہے۔ایرانی ایجنسی کے مطابق جنرل عاصم منیر آج تہران پہنچیں گے اور تہران کے حکام کے ساتھ جاری مذاکرات اور مشاورت میں حصہ لیں گے۔ یہ سرگرمیاں تہران اور واشنگٹن کے درمیان ثالثی کی کوششوں کا حصہ ہیں۔

اس سے قبل بدھ کے روز پاکستان کے وزیر داخلہ سید محسن نقوی ایک ہفتے کے دوران دوسری مرتبہ تہران پہنچے تھے، جہاں انہوں نے ایران کے وزیر داخلہ اور ملک کے صدر کے ساتھ ملاقاتیں اور تبادلہ خیال کیا۔

آئی ایس این اے کی رپورٹ کے مطابق، صدر مسعود پزشکیان نے سید محسن نقوی سے ملاقات کے دوران خطے کی تازہ ترین صورتحال، ایران اور امریکہ کے درمیان بالواسطہ مذاکرات، اور مختلف معاہدوں و سفارتی مشاورت کے عمل پر گفتگو کی۔یہ پیش رفت ایسے وقت میں سامنے آئی ہے جب امریکی صدر ڈونلڈ ٹرمپ ایران پر امن معاہدہ کرنے کے لیے دباؤ برقرار رکھے ہوئے ہیں اور مغربی ایشیا میں سفارتی سرگرمیاں تیزی سے جاری ہیں۔اس سے قبل جمعرات کو ایران کی سرکاری خبر رساں ایجنسی نور نیوز نے وزارت خارجہ کے ترجمان اسماعیل بقائی کے حوالے سے کہا کہ ہمیں امریکہ کے خیالات موصول ہو گئے ہیں اور ہم ان کا جائزہ لے رہے ہیں۔

تہران کا کہنا ہے کہ امریکی فریق کی تجویز پاکستانی ثالثوں کے ذریعے موصول ہوئی ہے۔ ایرانی وزارت خارجہ کے مطابق پاکستان تہران اور واشنگٹن کے درمیان پیغامات کے تبادلے میں بدستور ثالث کا کردار ادا کر رہا ہے۔ وزارت نے مزید بتایا کہ ایران کے اصل 14 نکاتی فریم ورک کی بنیاد پر رابطوں اور مشاورت کے کئی ادوار مکمل ہو چکے ہیں۔سفارتی مذاکرات کا تازہ دور امریکی صدر ٹرمپ کے سخت بیان کے بعد شروع ہوا، جس میں انہوں نے ایران سے کسی معاہدے کو حتمی شکل دینے کے لیے سنجیدہ ارادے ظاہر کرنے کا مطالبہ کیا تھا۔

ٹرمپ نے بدھ کے روز جوائنٹ بیس اینڈریوز میں صحافیوں سے گفتگو کرتے ہوئے کہا کہ صورتحال انتہائی نازک مرحلے پر ہے، یقین کیجیے۔ اگر ہمیں درست جواب نہیں ملے تو معاملات بہت تیزی سے آگے بڑھ سکتے ہیں۔ ہم پوری طرح تیار ہیں۔ ہمیں صرف درست جواب درکار ہیں، اور وہ سو فیصد تسلی بخش ہونے چاہیے۔

اس کے بعد وائٹ ہاؤس کے نائب چیف آف اسٹاف برائے پالیسی اور ہوم لینڈ سکیورٹی کے مشیر اسٹیفن ملر نے بھی ایران کے لیے سخت پیغام دیا۔فوکس نیوز سے گفتگو کرتے ہوئے انہوں نے کہا کہ ایران کے پاس ایک انتخاب ہے۔ یا تو وہ ایسے معاہدے پر رضامند ہو جو امریکہ کے لیے قابل قبول ہو، یا پھر اسے ہماری فوج کی ایسی کارروائی کا سامنا کرنا پڑے گا جس کی مثال جدید تاریخ میں نہیں ملتی۔ یہی وہ انتخاب ہے جس کا ایران سامنا کر رہا ہے۔

مغربی ایشیا کی صورتحال ایک بار پھر ممکنہ کشیدگی اور تنازع کے دہانے پر کھڑی دکھائی دے رہی ہے، تاہم متعدد فریقین کسی ایسے معاہدے تک پہنچنے کی کوشش کر رہے ہیں جو خطے میں تناؤ کو کم کر سکے اور حالات کو مزید بگڑنے سے روک سکے۔