نئی دہلی/ آواز دی وائس

ریلویز کے وزیر اشونی ویشنو نے ہفتہ کے روز قومی دارالحکومت میں پہلی وندے بھارت سلیپر ٹرین کا معائنہ کیا، جو گوہاٹی سے کولکتہ کے درمیان چلائی جائے گی۔ریلویز وزیر نے بتایا کہ کمشنر آف ریلوے سیفٹی  کے معائنے اور اس کے بعد سرٹیفکیشن مکمل ہونے کے بعد وزیر اعظم نریندر مودی وندے بھارت سلیپر ٹرین کا افتتاح کریں گے۔

ویشنو نے کہا کہ سی آر ایسکے معائنے اور سرٹیفکیشن کے بعد وندے بھارت افتتاح کے لیے تیار ہے۔ دو ریکس گوہاٹی اور کولکتہ منتقل کی جا رہی ہیں۔ آنے والے دنوں میں بہت جلد وزیر اعظم نریندر مودی جی اس وندے بھارت سلیپر ٹرین کا افتتاح کریں گے۔

ٹرین کی خصوصیات کے بارے میں وضاحت کرتے ہوئے ریلویز وزیر نے کہا کہ اگر آپ سیڑھیوں کو دیکھیں تو وہ چڑھنے کے لیے ایرگونومک انداز میں ڈیزائن کی گئی ہیں۔ آپ کو کئی خصوصیات نظر آئیں گی؛ ٹرے رکھنے کے لیے الگ فیچرز ہیں، اور پردے اس طرح تیار کیے گئے ہیں کہ آپ روشنی اور دھوپ کی مقدار کو آسانی سے کنٹرول کر سکیں۔ ہر جگہ بریل کا استعمال کیا گیا ہے، حتیٰ کہ سیٹ نمبرز بھی بریل میں ہیں۔ مسافروں کے آرام دہ سفر کو یقینی بنانے کے لیے باریکیوں پر خاص توجہ دی گئی ہے۔

معائنے کے بعد صحافیوں سے گفتگو کرتے ہوئے ویشنو نے کہا کہ وزیر اعظم مودی نے ریلوے کو مکمل طور پر تبدیل کرنے کا عزم کر رکھا ہے، اور رات کے سفر کے لیے وندے بھارت سلیپر ٹرینیں اسی سمت میں ایک نئی کوشش ہیں۔ انہوں نے بتایا کہ وندے بھارت سلیپر ٹرینوں میں کَوَچ نظام نصب ہے، جو ایک خودکار ٹرین تحفظ  نظام ہے۔ یہ نظام رفتار کی نگرانی کرتا ہے، سگنلز پر عمل درآمد یقینی بناتا ہے اور تصادم، تیز رفتاری اور خطرناک سگنل کراسنگ  سے بچاؤ کے لیے خودکار طور پر بریک لگاتا ہے۔

اشونی ویشنو نے کہا کہ وزیر اعظم نریندر مودی جی کا ایک عزم اور وژن ہے کہ ریلوے کو مکمل طور پر تبدیل کیا جائے، اور رات کے سفر کے لیے وندے سلیپر ٹرین اسی سمت میں ایک نئی کوشش ہے۔ اس ٹرین کا ڈیزائن مکمل طور پر نیا ہے۔ مسافروں کے آرام اور حفاظت کو مدنظر رکھتے ہوئے ہر پہلو پر کام کیا گیا ہے۔ سی سی ٹی وی کیمرے پہلے سے نصب ہیں اور کَوَچ نظام بھی موجود ہے۔ بریکنگ سسٹم کو بالکل نئے انداز میں پروگرام کیا گیا ہے۔ مسافروں کے آرام کے لیے نشستوں کو بھی نئے ڈیزائن کے ساتھ تیار کیا گیا ہے۔ ریلویز وزیر نے مزید بتایا کہ اس ٹرین کا کرایہ مناسب رکھا گیا ہے۔

انہوں نے کہا کہ وزیر اعظم ہمیشہ ہمیں یہ ترغیب دیتے رہے ہیں کہ ریلوے کو متوسط طبقے اور کم آمدنی والے خاندانوں کے لیے آمدورفت کا ایک آسان ذریعہ بنایا جائے۔ اسی کو ذہن میں رکھتے ہوئے کرایہ بھی بہت مناسب رکھا گیا ہے۔ وزیر اعظم بہت جلد اس کا افتتاح کریں گے۔ یہ ٹرین گوہاٹی اور کولکتہ کے درمیان چلے گی، شام کے وقت دونوں جانب سے روانہ ہوگی اور اگلی صبح اپنی منزل پر پہنچے گی۔ 31 دسمبر کو ریلوے نے کمشنر آف ریلوے سیفٹی  کی نگرانی میں مقامی طور پر ڈیزائن اور تیار کی گئی وندے بھارت سلیپر ٹرین کا آخری ہائی اسپیڈ ٹرائل کامیابی کے ساتھ مکمل کیا۔ یہ آزمائش کوٹا–نگدا سیکشن پر کی گئی، جس کے دوران ٹرین نے 180 کلومیٹر فی گھنٹہ کی زیادہ سے زیادہ رفتار حاصل کی، جو جدید اور خود کفیل ریلوے ٹیکنالوجی کی سمت ایک اہم سنگِ میل ہے۔

ٹرائل کے دوران جامع تکنیکی جانچ کی گئی، جس میں سفر کے استحکام، جھٹکوں، وائبریشن کے رویے، بریکنگ کارکردگی، ایمرجنسی بریکنگ سسٹم، حفاظتی نظام اور دیگر اہم پہلوؤں کا جائزہ شامل تھا۔ تیز رفتار پر ٹرین کی کارکردگی مکمل طور پر تسلی بخش پائی گئی اور  سی آر ایس نے اس آزمائش کو کامیاب قرار دیا۔