ترواننت پورم (کیرالا) :فیفا ورلڈ کپ 2026 کے آغاز میں چند ہی دن باقی رہ گئے ہیں، ایسے میں کیرالا کے محکمۂ عمومی تعلیم نے طلبہ کے لیے فٹ بال پر مبنی منشیات مخالف مہم "1 Million Toofan Goals@World Cup 2026" شروع کی ہے۔ یہ مہم 11 جون سے 20 جولائی تک جماعت اول سے بارہویں تک کے طلبہ کے لیے اسکولوں میں چلائی جائے گی، جس کا مقصد فٹ بال سے متعلق سرگرمیوں کے ذریعے منشیات کے نقصانات سے آگاہی پیدا کرنا ہے۔

مہم کا افتتاح وزیر داخلہ رمیش چنّیتھلا اور وزیر تعلیم این سمس الدین نے امبلامکّو کے گلوبل اسپورٹس سٹی ٹرف میں کیا۔ دونوں وزراء نے علامتی طور پر گول کرکے مہم کا آغاز کیا۔ اس موقع پر کیرالا انفراسٹرکچر اینڈ ٹیکنالوجی فار ایجوکیشن (کائٹ) کی جانب سے تیار کردہ ایک خصوصی ڈیش بورڈ کا بھی افتتاح کیا گیا، جو مہم کی نگرانی اور رابطہ کاری کے لیے استعمال ہوگا۔

اس سے قبل رمیش چنّیتھلا نے "آپریشن طوفان: دی نارکو ہنٹ" نامی ریاست گیر مہم کا آغاز کیا تھا، جس کا مقصد منشیات فروش نیٹ ورک کو ختم کرنا اور نشہ آور اشیا کے بڑھتے ہوئے خطرے پر قابو پانا ہے۔ ایکس پر ایک پوسٹ میں انہوں نے کہا کہ یہ مہم محکمۂ صحت اور محکمۂ ایکسائز کے تعاون سے چلائی جائے گی اور منشیات کی اسمگلنگ کو جڑ سے ختم کرنے پر توجہ دے گی۔

انہوں نے لکھا، ’’آپریشن طوفان: دی نارکو ہنٹ۔ آج سے آغاز۔ محکمۂ صحت اور ایکسائز کے اشتراک سے ریاست میں منشیات مافیا کے خاتمے اور اس لعنت کو جڑ سے اکھاڑ پھینکنے کے لیے یہ مہم شروع کی جا رہی ہے۔ اس اقدام کے لیے دعاؤں اور تعاون کی ضرورت ہے۔‘‘ کیرالا میں منشیات سے متعلق جرائم میں تیزی سے اضافے کے باعث اس مہم کا آغاز کیا گیا ہے۔

پولیس کے اعداد و شمار کے مطابق 2025 میں این ڈی پی ایس ایکٹ کے تحت 36,314 مقدمات درج ہوئے، جبکہ 2024 میں یہ تعداد 27,530 تھی۔ نیشنل کرائم ریکارڈز بیورو (این سی آر بی) کے مطابق 2023 میں بھی کیرالا میں ملک بھر میں سب سے زیادہ، یعنی 30,697 منشیات سے متعلق مقدمات درج کیے گئے تھے۔

مہم کے آغاز سے قبل کیرالا پولیس نے عوام سے بھرپور تعاون کی اپیل کی تھی۔ 28 مئی کو ایکس پر جاری بیان میں پولیس نے کہا تھا، ’’آپریشن طوفان: دی نارکو ہنٹ۔ یکم جون سے ایک صحت مند مستقبل کے لیے مل کر آگے بڑھیں۔ نشے کو جڑ سے ختم کریں۔ عوام، اسکولوں اور خاندانوں کے اشتراک سے ہم اپنے گھروں میں امن اور سڑکوں پر بے خوف ماحول کو یقینی بنا سکتے ہیں۔‘‘