نئی دہلی
مرکزی وزیر داخلہ امت شاہ جمعرات کو گجرات کے دو روزہ دورے پر جائیں گے۔ اس دوران وہ ایک درجن سے زائد پروگراموں میں شرکت کریں گے، جن میں سرحدی چوکی "ہرامی نالہ" کا معائنہ اور وہاں قائم کنٹرول روم میں پی ٹی زیڈ (پین، ٹِلٹ اور زوم) کیمروں کی فیڈ کا جائزہ لینا بھی شامل ہے۔
اس سے قبل منگل کو مرکزی وزیر داخلہ امت شاہ نے ملک میں آبادیاتی تبدیلیوں کے مسئلے کا جائزہ لینے کے لیے ایک اعلیٰ سطحی کمیٹی کے قیام کا اعلان کیا تھا۔ انہوں نے اسے قومی سلامتی، خودمختاری اور سماجی استحکام کے لیے دور رس اثرات رکھنے والا ایک سنگین چیلنج قرار دیا۔
امت شاہ نے سوشل میڈیا پلیٹ فارم ایکس پر ایک پوسٹ کے ذریعے اس اعلان کو یومِ آزادی 2025 کے موقع پر وزیر اعظم نریندر مودی کی جانب سے کیے گئے اعلان کا تسلسل قرار دیا۔انہوں نے کہا کہ حکومت نے اب غیر قانونی دراندازی اور آبادی کے رجحانات کو متاثر کرنے والے دیگر "غیر فطری" عوامل سے پیدا ہونے والے خدشات کا جائزہ لینے کے لیے "آبادیاتی تبدیلیوں پر اعلیٰ سطحی کمیٹی" تشکیل دے دی ہے۔
امت شاہ نے اپنی پوسٹ میں لکھا کہدراندازی اور دیگر عوامل جو غیر فطری آبادیاتی تبدیلیوں کا سبب بنتے ہیں، کسی بھی قوم کے حال اور مستقبل کے لیے ایک بہت بڑا چیلنج ہوتے ہیں۔ اسی چیلنج سے نمٹنے کے لیے 15 اگست 2025 کو وزیر اعظم نریندر مودی نے اس کمیٹی کے قیام کا اعلان کیا تھا۔ مجھے خوشی ہے کہ حکومت نے اب اس کمیٹی کو تشکیل دے دیا ہے۔
اس کمیٹی کی سربراہی سپریم کورٹ کے ریٹائرڈ جج جسٹس پرکاش پربھاکر ناولیکر کریں گے۔
کمیٹی کے دیگر ارکان میں مردم شماری کمشنر، سابق آئی اے ایس افسر درگا شنکر مشرا، سابق آئی پی ایس افسر بالاجی سریواستو اور ماہر اقتصادیات شامیکا روی شامل ہیں۔وزارت داخلہ میں جوائنٹ سیکریٹری (فارنرز-I) اس کمیٹی کے رکن سیکریٹری کی حیثیت سے خدمات انجام دیں گے۔
کمیٹی کے دائرۂ کار پر روشنی ڈالتے ہوئے امت شاہ نے کہا کہ آبادیاتی تبدیلی ایک "انتہائی سنگین مسئلہ" ہے، جو نہ صرف ملک کی خودمختاری سے جڑا ہوا ہے بلکہ قومی سلامتی، امن و امان، سماجی ڈھانچے میں گہری تبدیلیوں اور قبائلی معاشرے کے تحفظ سے بھی متعلق ہے۔انہوں نے کہا کہ کمیٹی کو پورے ملک میں آبادیاتی تبدیلیوں کا جامع جائزہ لینے کی ذمہ داری سونپی گئی ہے۔
حکومت کے عزم کا اعادہ کرتے ہوئے امت شاہ نے کہا کہ یہ اقدام قومی مفادات کے تحفظ کے لیے ایک فعال حکمت عملی کی عکاسی کرتا ہے۔انہوں نے مزید کہا کہ ہم اس بات کے لیے پُرعزم ہیں کہ سوچے سمجھے اور فیصلہ کن اقدامات کے ذریعے ملک کی سالمیت اور اس کے سماجی تانے بانے کو محفوظ رکھا جائے۔
.webp "امت شاہ 28 مئی کو گجرات کے دو روزہ دورے پر ہوں گے")
