نئی دہلی
مرکزی وزیر داخلہ امت شاہ نے بدھ کے روز دہلی کے مالویہ نگر میں پیش آنے والے المناک آتشزدگی کے واقعے پر گہرے دکھ کا اظہار کیا، جس میں 21 افراد جان کی بازی ہار گئے، جبکہ جائے وقوعہ پر امدادی اور ریسکیو کارروائیاں جاری ہیں۔ایکس پر جاری اپنے بیان میں امت شاہ نے کہا کہ دہلی کے مالویہ نگر میں پیش آنے والے آتشزدگی کے واقعے سے میرا دل انتہائی رنجیدہ ہے۔ مقامی انتظامیہ امدادی اور بچاؤ کارروائیوں میں مصروف ہے۔ اس دل دہلا دینے والے سانحے میں اپنے پیاروں کو کھونے والے خاندانوں کے ساتھ میری گہری ہمدردیاں ہیں۔ اللہ تعالیٰ سوگوار خاندانوں کو یہ صدمہ برداشت کرنے کی طاقت عطا فرمائے۔
انہوں نے مزید کہا کہ زخمیوں کو بہترین طبی سہولیات فراہم کی جا رہی ہیں۔ تمام زخمیوں کے لیے اعلیٰ طبی سہولیات کا انتظام کیا گیا ہے اور میں ان کی جلد صحت یابی کے لیے دعا گو ہوں۔
دفاعی وزیر راجناتھ سنگھ نے بھی اس واقعے پر افسوس کا اظہار کرتے ہوئے اسے "دل خراش" قرار دیا اور متاثرہ خاندانوں سے تعزیت کی۔انہوں نے ایکس پر لکھا کہ دہلی کے مالویہ نگر میں پیش آنے والا آتشزدگی کا واقعہ نہایت افسوسناک اور دل دہلا دینے والا ہے۔ اس سانحے میں اپنے عزیزوں کو کھونے والے خاندانوں سے میری گہری ہمدردیاں ہیں۔ اللہ تعالیٰ انہیں یہ عظیم صدمہ برداشت کرنے کی ہمت عطا فرمائے اور زخمیوں کو جلد صحت عطا کرے۔
دہلی پولیس کے مطابق، جاں بحق ہونے والوں میں 15 سے زائد غیر ملکی شہری بھی شامل ہیں۔
جنوبی دہلی کے ڈپٹی کمشنر آف پولیس اننت متل نے بتایا کہ آگ مالویہ نگر کے فلورش اسٹے بی اینڈ بی میں صبح تقریباً 8:48 بجے لگی، جس کے بعد فوری طور پر ریسکیو آپریشن شروع کر دیا گیا۔انہوں نے کہا کہ آج صبح 8:48 بجے فلورش اسٹے بی اینڈ بی میں آگ لگنے کی اطلاع موصول ہوئی۔ مقامی پولیس فوراً موقع پر پہنچی اور ریسکیو، انخلا اور امدادی کارروائیاں شروع کر دیں۔ فائر بریگیڈ کی آٹھ گاڑیوں کی مدد سے آگ پر قابو پا لیا گیا۔
اننت متل نے تصدیق کی کہ 40 سے زائد افراد کو بچا کر قریبی اسپتالوں میں منتقل کیا گیا، جبکہ 21 افراد کو مردہ قرار دیا گیا۔ انہوں نے کہا کہ پولیس، فائر سروسز اور دیگر ہنگامی اداروں کی مشترکہ کوششوں سے 40 سے زائد افراد کو محفوظ نکال کر اسپتالوں میں منتقل کیا گیا۔ انتہائی افسوس کے ساتھ کہنا پڑ رہا ہے کہ اس سانحے میں 21 افراد جاں بحق ہو گئے ہیں۔
انہوں نے مزید کہا کہ ریسکیو اور سرچ آپریشن اب بھی جاری ہے اور تمام متعلقہ ادارے متاثرین کو ہر ممکن مدد فراہم کرنے کے لیے موقع پر موجود ہیں۔اس سے قبل دہلی کی وزیر اعلیٰ ریکھا گپتا نے بھی واقعے پر تعزیت کا اظہار کرتے ہوئے کہا کہ اطلاع ملتے ہی دہلی فائر سروس، دہلی پولیس، ڈی ڈی ایم اے اور کیٹس ایمبولینس سروس کو فوری طور پر متحرک کر دیا گیا تھا۔
انہوں نے کہا، "مالویہ نگر کے المناک آتشزدگی کے واقعے میں قیمتی جانوں کے ضیاع پر مجھے گہرا دکھ ہے۔ میری دلی تعزیت متاثرہ خاندانوں کے ساتھ ہے۔" انہوں نے مزید کہا کہ حکومت صورتحال پر مسلسل نظر رکھے ہوئے ہے اور ہر ممکن مدد فراہم کی جا رہی ہے۔دہلی کے لیفٹیننٹ گورنر ونئے کمار سکسینہ نے بھی واقعے پر افسوس کا اظہار کرتے ہوئے اسے "انتہائی تشویشناک" قرار دیا اور حکام کو فوری طبی امداد اور مکمل تحقیقات یقینی بنانے کی ہدایت دی۔
دریں اثنا، عام آدمی پارٹی کے سابق رکن اسمبلی سومناتھ بھارتی نے کہا کہ ابتدائی طور پر لگتا ہے کہ آگ شارٹ سرکٹ کے باعث لگی۔انہوں نے کہا کہ آج صبح تقریباً 8 بجے شارٹ سرکٹ کے باعث آگ بھڑکی، جو پہلے کچن تک اور پھر ساتھ موجود ہوٹل کی بالائی منزلوں تک پھیل گئی۔" انہوں نے مطالبہ کیا کہ دہلی حکومت جاں بحق افراد کے اہل خانہ کو ایک ایک کروڑ روپے معاوضہ فراہم کرے۔
ادھر حکام نے آگ لگنے کی وجوہات جاننے کے لیے تفصیلی تحقیقات شروع کر دی ہیں، جبکہ جائے وقوعہ پر امدادی اور ریسکیو کارروائیاں مسلسل جاری ہیں۔
.webp "امت شاہ، راج ناتھ سنگھ نے مالویہ نگر میں آتشزدگی پر اظہار افسوس کیا")
