نئی دہلی

مرکزی وزیرِ تعاون امیت شاہ نے جمعہ کے روز کرگل میں یومیہ 10,000 لیٹر صلاحیت کے حامل ڈیری پلانٹ کا سنگِ بنیاد رکھا۔وزیر نے اس کے ساتھ لداخ میں ڈیری ترقی سے متعلق کئی آن لائن اقدامات بھی پیش کیے۔

حکام کے مطابق یہ اقدامات وزیر اعظم نریندر مودی کی قیادت میں متعارف کرائے گئے ہیں۔ ان میں موبائل دودھ جانچ لیبارٹریاں، جدید دودھ کولنگ سسٹم اور ڈیری انفراسٹرکچر کو مضبوط بنانا شامل ہے تاکہ مرکز کے زیر انتظام علاقے میں خود انحصاری کو فروغ دیا جا سکے۔

حکام نے بتایا کہ 10,000 لیٹر یومیہ صلاحیت والا جدید ڈیری پروسیسنگ پلانٹ تقریباً 25 کروڑ روپے کی لاگت سے نیشنل ڈیری ڈیولپمنٹ بورڈ (این ڈی ڈی بی) کی مکمل ملکیتی ذیلی کمپنی انڈین ڈیری مشینری کمپنی کے ذریعے قائم کیا جا رہا ہے۔

یہ منصوبہ ماہی پروری، مویشی پروری اور ڈیری وزارت کے نیشنل ڈیری ڈیولپمنٹ پروگرام (این پی ڈی ڈی) کے تحت نافذ کیا جا رہا ہے، جس میں 12.74 کروڑ روپے کا گرانٹ، 10 کروڑ روپے کی مدد نیشنل ڈیری ڈیولپمنٹ فاؤنڈیشن سے اور باقی رقم ایل یو ٹی ڈی سی ایف فنڈ کے ذریعے (ہماچل پردیش انتظامیہ کے ذریعہ) فراہم کی جا رہی ہے۔

یہ پلانٹ 350 کلو واٹ کے شمسی توانائی کے نظام پر چلے گا، جس سے اس بلند و بالا علاقے میں صاف اور پائیدار آپریشن یقینی بنایا جائے گا۔دودھ جمع کرنے کے لیے جدید موبائل "ملک کلیکشن" اور "کولنگ سسٹم" نصب کیے جائیں گے، جس سے کسانوں سے براہِ راست دودھ جمع کرنے، معیار برقرار رکھنے اور علاقائی معیشت کو مضبوط کرنے میں مدد ملے گی۔

حکام کا کہنا ہے کہ یہ اقدامات لداخ کے ڈیری سیکٹر کی جدید کاری، کسانوں کی آمدنی بڑھانے اور خریداری کے نظام میں شفافیت کو یقینی بنانے کی وسیع کوششوں کا حصہ ہیں۔ اس کے ساتھ بجلی سے متعلق مسائل کے حل، دودھ جمع کرنے کے نظام کو منظم بنانے اور کسانوں کو بروقت ڈیجیٹل ادائیگی یقینی بنانے کے لیے بھی اقدامات کیے گئے ہیں۔ہندوستانی فوج کے ساتھ باقاعدہ دودھ سپلائی کے انتظام سے اس علاقے میں ڈیری سرگرمیوں کو مستحکم بازار ملا ہے، جس سے نظام کی اعتباریت میں اضافہ ہوا ہے۔

ڈیجیٹل اصلاحات کے تحت اے آئی پر مبنی نگرانی نظام، موبائل دودھ جمع کرنے کی یونٹس اور موسمی حالات سے ہم آہنگ کولنگ حل نافذ کیے گئے ہیں تاکہ معیار اور شفافیت برقرار رہے۔

ان اقدامات کے اثرات اب سامنے آنے لگے ہیں۔ ایک گاؤں کے 74 کسانوں سے شروع ہونے والا یہ نیٹ ورک اب تقریباً 1,700 کسانوں تک پہنچ چکا ہے۔ یومیہ دودھ جمع کرنے کی مقدار تقریباً 7,000 لیٹر ہو گئی ہے اور کسانوں کو مجموعی طور پر 15 کروڑ روپے سے زیادہ ادائیگی کی جا چکی ہے۔

یہ شمسی توانائی سے چلنے والا پلانٹ ہزاروں کسانوں کو براہِ راست فائدہ پہنچائے گا، ان کی آمدنی میں اضافہ کرے گا اور مقامی زرعی ویلیو چین کو مضبوط بنائے گا۔حکام نے بتایا کہ موبائل لیبارٹریوں کی تعیناتی، کولڈ چین نیٹ ورک کی توسیع اور ڈیجیٹل آٹومیٹڈ ملک کلیکشن سسٹم (اے ایم سی ایس) کو اپنانے جیسے اقدامات بھی جاری ہیں، جس سے کارکردگی میں اضافہ ہوگا۔

اس کے علاوہ پنیر اور دہی جیسے مصنوعات کے ذریعے ویلیو ایڈیشن کو فروغ دیا جا رہا ہے۔ مدر ڈیری، سفّل اور دھارا جیسے برانڈز کے ساتھ شراکت داری کر کے صارفین کو معیاری ڈیری مصنوعات فراہم کرنے کی منصوبہ بندی کی جا رہی ہے۔