سلی گوڑی (مغربی بنگال): مرکزی وزیر داخلہ امت شاہ نے ہفتہ کے روز سلی گوڑی کوریڈور کی سلامتی سے متعلق ایک اہم اجلاس منعقد کیا۔ مغربی بنگال کے وزیر اعلیٰ سویندو ادھیکاری بھی اجلاس میں موجود تھے۔ اس سے قبل امت شاہ نے سلی گوڑی میں مغربی بنگال کی گورکھا برادری کے ارکانِ پارلیمنٹ، ارکانِ اسمبلی اور اہم نمائندوں کے ساتھ بھی ملاقات کی۔

گورکھا جن مکتی مورچہ (GJM) کے جنرل سکریٹری روشن گری نے بتایا کہ ایک کمیٹی تشکیل دی جائے گی جو حکومتِ ہند کو اگلی تجویز پیش کرے گی۔ انہوں نے اجلاس کے بعد کہا، ’’وزیر داخلہ امت شاہ نے واضح طور پر کہا ہے کہ اس مسئلے کا کوئی بھی حل آئینی طریقے سے نکالا جائے گا۔ مذاکرات کار پنکج سنگھ کی قیادت میں ایک کمیٹی تشکیل دی جائے گی، جو اگلی تجویز حکومتِ ہند کو پیش کرے گی۔‘‘

بی جے پی کے رکن پارلیمنٹ کھگین مرمو نے بتایا کہ اجلاس میں شمالی بنگال کو درپیش خطرات اور اسے خطے کے باقی حصوں سے الگ کرنے کی کوششوں پر توجہ مرکوز کی گئی۔ انہوں نے کہا کہ وزیر داخلہ گزشتہ چند دنوں سے شمالی بنگال کے سلی گوڑی میں موجود ہیں اور خطے کے مختلف مسائل پر تفصیلی بات چیت جاری ہے۔

ان کے مطابق خاص طور پر ’چکنز نیک‘ کوریڈور کو لاحق خطرات اور شمالی بنگال کو باقی علاقے سے الگ کرنے کی کوششوں کو روکنے کے طریقوں پر غور کیا جا رہا ہے۔ اجلاس کے بعد بی جے پی کے رکن پارلیمنٹ ہرش وردھن شرنگلا نے کہا کہ وزیر داخلہ نے سلی گوڑی کا دورہ کرکے گورکھا برادری کے نمائندوں، متعدد افسران اور وزیر اعلیٰ سویندو ادھیکاری کے ساتھ اہم اجلاس کیا۔ انہوں نے کہا کہ یہ اجلاس مثبت نتائج کی جانب ایک قدم ہے اور گورکھالینڈ کے مسئلے کے حل کی تلاش کا عمل شروع ہو گیا ہے۔

شرنگلا نے بتایا کہ اس معاملے کی تفصیلی جانچ کے لیے ایک کمیٹی تشکیل دی جائے گی، جو گورکھالینڈ کے مذاکرات کار پنکج کی قیادت میں کام کرے گی۔ انہوں نے کہا کہ فی الحال کوئی حتمی مدت مقرر نہیں کی جا سکتی کیونکہ یہ عمل ابھی ابتدائی مرحلے میں ہے۔ انہوں نے مزید کہا کہ سلی گوڑی کوریڈور کی سلامتی کو ہر صورت یقینی بنایا جائے گا اور علاقے کی ترقی اور عوام کی امنگوں کو پورا کرنے کے لیے تمام ضروری اقدامات کیے جائیں گے۔

سلی گوڑی کوریڈور کو عام طور پر ’’چکنز نیک‘‘ کہا جاتا ہے۔ یہ ہندوستان کے شمال مشرقی ریاستوں کو ملک کے باقی حصے سے جوڑنے والا ایک انتہائی اہم زمینی راستہ ہے، اس لیے اس کی سلامتی کو قومی اہمیت حاصل ہے۔ اس سے ایک روز قبل، جمعہ کو امت شاہ نے سلی گوڑی میں مسلح سرحدی فورس (ایس ایس بی) کے اہلکاروں کے ساتھ ’بڑا کھانا‘ میں شرکت کی تھی۔ امت شاہ کے مطابق ’بڑا کھانا‘ ہندوستانی سکیورٹی فورسز کی ایک روایت ہے، جس میں جوان اور افسران ایک ساتھ کھانا کھاتے ہیں، جس سے ان کے درمیان باہمی تعلق مضبوط ہوتا ہے اور مشترکہ مقصد کے لیے حوصلہ بڑھتا ہے۔