نئی دہلی

مغربی ایشیا کے بحران کے درمیان ایندھن کے ذمہ دارانہ استعمال کے لیے وزیرِ اعظم نریندر مودی کی "سات اپیلوں" کے بعد مرکزی وزیرِ داخلہ  امت شاہ  نے اپنے قافلے کا حجم گھٹا کر آدھے سے بھی کم کر دیا ہے۔ وزیرِ داخلہ کے قافلے میں گاڑیوں کی تعداد میں یہ کمی حکومت کی اُس بڑی کوشش کا حصہ ہے، جس کا مقصد تمام ضروری سکیورٹی انتظامات کو برقرار رکھتے ہوئے وسائل کے مؤثر استعمال کو فروغ دینا ہے۔

یہ قدم وزیرِ اعظم مودی کے حالیہ گجرات اور آسام کے گھریلو دوروں کے دوران اپنے قافلے کا حجم نمایاں طور پر کم کرنے کے فوراً بعد اٹھایا گیا ہے؛ تاہم انہوں نے اسپیشل پروٹیکشن گروپ پروٹوکول کے تحت تمام ضروری حفاظتی انتظامات برقرار رکھے تھے۔ ذرائع کے مطابق وزیرِ اعظم کا یہ فیصلہ حیدرآباد میں ان کی تقریر کے فوراً بعد نافذ کیا گیا۔ اس تقریر میں انہوں نے شہریوں سے اپیل کی تھی کہ وہ درآمد شدہ ایندھن پر اپنا انحصار کم کرکے اور ماحول دوست متبادل اپناتے ہوئے ملک کی اقتصادی مضبوطی میں تعاون کریں۔

وزیرِ اعظم کی اپیل کے بعد، امت شاہ نے بھی سکیورٹی پروٹوکول سے کوئی سمجھوتہ کیے بغیر اپنے قافلے کے ساتھ چلنے والی گاڑیوں کی تعداد کم کرنے کا فیصلہ کیا۔ ماحول دوستی کو فروغ دینے کے مقصد سے اٹھائے گئے ایک اور قدم کے تحت، وزیرِ اعظم مودی نے حکام کو ہدایت دی ہے کہ جہاں بھی ممکن ہو، ان کے قافلے میں الیکٹرک گاڑیاں شامل کی جائیں، بشرطیکہ اس کے لیے کوئی نئی خریداری نہ کرنی پڑے۔

اس ہفتے کے آغاز میں سکندرآباد میں ایک عوامی جلسے سے خطاب کرتے ہوئے، وزیرِ اعظم مودی نے اس بات پر زور دیا کہ آج کے دور میں حب الوطنی کا مطلب صرف ملک کی سرحدوں کی حفاظت کرنا ہی نہیں، بلکہ روزمرہ زندگی میں ذمہ دارانہ طرزِ عمل اختیار کرنا بھی ہے۔

وزیرِ اعظم نے کہا تھا کہ حب الوطنی کا مطلب صرف سرحد پر اپنی جان قربان کرنے کی خواہش رکھنا ہی نہیں ہے۔ آج کے زمانے میں اس کا مطلب ہے ذمہ داری کے ساتھ زندگی گزارنا اور اپنی روزمرہ زندگی میں ملک کے تئیں اپنے فرائض ادا کرنا۔عالمی بے چینی اور ایندھن کی بڑھتی قیمتوں کے اثرات کو اجاگر کرتے ہوئے، وزیرِ اعظم مودی نے عوام سے اپیل کی کہ وہ پٹرول اور ڈیزل کی کھپت کم کرنے کے لیے عوامی ٹرانسپورٹ، کار پولنگ اور الیکٹرک گاڑیوں کا زیادہ سے زیادہ استعمال کریں۔

وزیرِ اعظم نے شہریوں سے یہ بھی درخواست کی کہ وہ درآمدات پر انحصار کم کرنے کے لیے خوردنی تیل کے استعمال میں کمی لائیں، جبکہ کسانوں سے اپیل کی کہ وہ کیمیائی کھادوں کا استعمال کم کرکے قدرتی کھیتی کے طریقے اپنائیں۔وزیرِ اعظم مودی نے کہا تھا کہ خوردنی تیل کے معاملے میں بھی یہی بات لاگو ہوتی ہے۔ اس کی درآمد پر ہمیں زرمبادلہ خرچ کرنا پڑتا ہے۔ اگر ہر گھر خوردنی تیل کا استعمال کم کر دے تو یہ حب الوطنی کے لیے ایک بہت بڑا تعاون ہوگا۔