بی ایس ایف کی ہیرک جینتی تقریبات کے تحت فورس کی پہلی مکمل خواتین کوہ پیمائی ٹیم نے کامیابی کے ساتھ ماؤنٹ ایورسٹ سر کیا اور جمعرات کی صبح 8 بجے (ہندوستانی وقت کے مطابق) 8,848.86 میٹر بلند چوٹی تک پہنچ گئی۔

اس مہم جو ٹیم میں کانسٹیبل کوثر فاطمہ (لداخ)، کانسٹیبل من من گھوش (مغربی بنگال)، کانسٹیبل ربیکا سنگھ (اتراکھنڈ) اور کانسٹیبل تسیرنگ چورول (کارگل) شامل تھیں۔بی ایس ایف نے اپنے بیان میں کہا، ’’غیر معمولی جرات اور مضبوط عزم کے ساتھ دنیا کی بلند ترین چوٹی کو سر کرتے ہوئے بی ایس ایف کی پہلی ’آل ویمن ماؤنٹ ایورسٹ ایکسپیڈیشن ٹیم‘ نے مشن وندے ماترم کے تحت ماؤنٹ ایورسٹ پر کامیاب چڑھائی کرکے تاریخ رقم کر دی ہے۔

بی ایس ایف کی پہلی خواتین کوہ پیمائی ٹیم، جس میں لداخ کی کانسٹیبل کوثر فاطمہ، مغربی بنگال کی کانسٹیبل من من گھوش، اتراکھنڈ کی کانسٹیبل ربیکا سنگھ اور کارگل کی کانسٹیبل تسیرنگ چورول شامل تھیں، نے آج صبح 8 بجے (ہندوستانی وقت کے مطابق) ماؤنٹ ایورسٹ (8,848.86 میٹر) کی چوٹی کامیابی سے سر کر لی۔

بی ایس ایف کے مطابق، مہم میں شامل خواتین نے چوٹی پر پہنچ کر ’’وندے ماترم‘‘ گا کر اس تاریخی لمحے کو یادگار بنا دیا۔بیان میں مزید کہا گیا کہ بی ایس ایف کے ہیرک جینتی سال کی تقریبات کے دوران خواتین سرحدی محافظوں نے ’وندے ماترم‘ کے جذبے کو دنیا کی بلند ترین چوٹی تک پہنچایا۔ ایسی بلندی پر، جہاں زیادہ تر لوگوں کو آکسیجن کی مدد درکار ہوتی ہے اور سیدھا کھڑا رہنا بھی ایک بڑا چیلنج ہوتا ہے، انہوں نے ایک مضبوط اور متحد آواز میں ’وندے ماترم‘ گایا۔

یہ ایک تاریخی سنگِ میل ہے جو ’ناری شکتی‘ کی طاقت، برداشت اور ناقابلِ تسخیر حوصلے کی عکاسی کرتا ہے۔ یہ غیر معمولی کامیابی خواتین کو بااختیار بنانے، قومی فخر اور بہترین کارکردگی کے لیے بی ایس ایف کے غیر متزلزل عزم کی ایک قابلِ فخر علامت ہے۔