کولکاتا: مرکزی وزیر داخلہ امت شاہ پیر کو شیاما پرساد مکھرجی کی 125ویں یومِ پیدائش کی تقریبات میں شرکت کے لیے کولکاتا پہنچے، جہاں ریاستی حکومت نے بھی اس موقع پر مختلف پروگراموں کا اہتمام کیا ہے۔ ایک روزہ دورے پر کولکاتا پہنچنے والے امت شاہ کا ہوائی اڈے پر مغربی بنگال کے وزیر اعلیٰ سوویندو ادھیکاری، ریاستی بی جے پی کے صدر سامک بھٹاچاریہ اور ریاستی کابینہ کے دیگر وزراء نے استقبال کیا۔

امت شاہ سب سے پہلے جنوبی کولکاتا کے بھوانی پور میں واقع شیاما پرساد مکھرجی کی آبائی رہائش گاہ جائیں گے، جہاں وہ سابق مرکزی وزیر اور ماہر تعلیم کو گلِ عقیدت پیش کریں گے۔ اس کے بعد وہ شہر کے مشرقی علاقے میں واقع ایکو پارک جائیں گے، جہاں بھارتیہ جن سنگھ کے بانی شیاما پرساد مکھرجی کے مجوزہ 125 فٹ بلند مجسمے کی تعمیر کے لیے سنگِ بنیاد رکھنے اور بھومی پوجن کی تقریب میں شرکت کریں گے۔

شام کے وقت امت شاہ بسوا بنگلا میلہ گراؤنڈ میں منعقد ہونے والی یادگاری تقریب میں شرکت کریں گے، جس میں بی جے پی کے سینئر رہنما، کارکن اور ریاست بھر سے بڑی تعداد میں حامی شریک ہونے کی توقع ہے۔ یادگاری تقریبات میں شرکت کے علاوہ مرکزی وزیر داخلہ مغربی بنگال بی جے پی کی قیادت کے ساتھ تنظیمی امور اور ریاست میں پارٹی کی آئندہ حکمت عملی پر بھی تبادلۂ خیال کریں گے۔