کولکاتا: مغربی بنگال کے وزیر دلیپ گھوش نے جمعہ کو الزام لگایا کہ جادَوپور یونیورسٹی کے کیمپس میں کچھ گروہ ’’ملک مخالف سرگرمیوں‘‘ میں ملوث ہیں اور کہا کہ تعلیمی ادارے میں ایسی سرگرمیوں کی اجازت نہیں دی جانی چاہیے۔ صحافیوں سے بات کرتے ہوئے گھوش نے کہا کہ ریاستی یونیورسٹی کے وائس چانسلر کو کیمپس میں ہونے والی سرگرمیوں کی ذمہ داری قبول کرنی ہوگی۔

انہوں نے کہا، ’’کچھ گروہ ایسے ہیں جو سرگرم رہتے ہیں اور اکثر ملک مخالف نعرے لگاتے اور ایسی سرگرمیوں میں ملوث ہوتے ہیں۔ گورنر کے ساتھ بدسلوکی کے واقعات بھی پیش آئے ہیں۔‘‘ گھوش نے کہا کہ سابق وزیر بابل سپریو کے ساتھ بھی کیمپس میں بدسلوکی کی گئی تھی۔ انہوں نے کہا، ’’کم از کم کسی یونیورسٹی کے اندر ایسی ملک مخالف اور سماج دشمن سرگرمیوں کی اجازت نہیں دی جانی چاہیے۔ اس لیے اس طرح کی سرگرمیوں کو روکا جانا ضروری ہے۔‘‘ انہوں نے کہا کہ طلبہ کی سیاست میں تاریخی طور پر کشیدگی رہی ہے اور پولیس کو یہ معلوم کرنا ہوگا کہ جمعرات کو ہونے والے تشدد کے دوران اصل میں کیا ہوا تھا۔

گھوش نے کہا، ’’یونیورسٹی کے وائس چانسلر کو بھی ذمہ داری قبول کرنی ہوگی۔ لیکن یونیورسٹی کے اندر امن اور نظم و ضبط برقرار رہنا چاہیے۔‘‘ جمعرات کی علی الصبح جادَوپور یونیورسٹی میں آر ایس ایس سے وابستہ اکھل بھارتیہ ودیارتھی پریشد (اے بی وی پی) اور بائیں بازو سے وابستہ طلبہ تنظیموں کے ارکان کے درمیان جھڑپ ہوگئی تھی۔ دونوں فریقوں نے ایک دوسرے پر کیمپس میں بیرونی افراد کو لانے کا الزام عائد کیا۔ تشدد میں کئی طلبہ زخمی ہوئے، جن میں سے کچھ کو اسپتال لے جایا گیا۔ جنوبی کولکاتا میں واقع یونیورسٹی کے مرکزی کیمپس کے کئی مقامات پر آگ لگنے کی اطلاعات بھی سامنے آئیں۔

یونیورسٹی کے ایک عہدیدار کے مطابق، یہ تنازع بدھ کو فیکلٹی آف انجینئرنگ اینڈ ٹیکنالوجی اسٹوڈنٹس یونین (FETSU) کی ایک میٹنگ سے شروع ہوا اور دیر رات تک جاری رہا۔ وائس چانسلر چرنجیب بھٹاچاریہ نے واقعے کو ’’ناپسندیدہ‘‘ قرار دیتے ہوئے کہا کہ اس کی تحقیقات کے لیے ایک کمیٹی تشکیل دی جائے گی۔ انہوں نے یہ بھی کہا کہ غروب آفتاب کے بعد بیرونی افراد کے کیمپس میں داخلے پر پابندی عائد کر دی گئی ہے۔