نئی دہلی : وزارتِ بندرگاہ، جہاز رانی اور آبی گزرگاہوں کے ڈائریکٹر شپنگ اوپیش کمار شرما نے بدھ کے روز کہا کہ خطے میں موجود تمام بھارتی ملاح محفوظ ہیں اور گزشتہ 48 گھنٹوں کے دوران کسی بھی بھارتی پرچم بردار جہاز کے ساتھ کوئی ناخوشگوار واقعہ پیش نہیں آیا۔

انہوں نے مغربی ایشیا کی صورتحال پر ایک بین الوزارتی بریفنگ میں بتایا کہ وزارت مسلسل وزارتِ خارجہ ہند، بھارتی مشنز اور بحری شعبے کے دیگر اداروں کے ساتھ رابطے میں ہے تاکہ ملاحوں کی حفاظت اور سمندری سرگرمیوں کا تسلسل برقرار رکھا جا سکے۔ شرما کے مطابق، اب تک خلیجی خطے سے 2,999 سے زائد بھارتی ملاحوں کی بحفاظت وطن واپسی ممکن بنائی گئی ہے، جن میں گزشتہ 48 گھنٹوں میں واپس آنے والے 23 افراد بھی شامل ہیں۔

انہوں نے بتایا کہ ڈائریکٹوریٹ جنرل آف شپنگ کے قائم کردہ کنٹرول روم کو اب تک 8,570 کالز اور 18,732 سے زائد ای میلز موصول ہو چکی ہیں، جن میں سے صرف گزشتہ دو دنوں میں 156 کالز اور 668 ای میلز شامل ہیں۔ آبنائے ہرمز میں صورتحال پر بات کرتے ہوئے انہوں نے کہا کہ اب تک 11 جہاز—جن میں 10 بھارتی پرچم بردار ہیں آبنائے ہرمز عبور کر چکے ہیں۔ آخری جہاز "سرو شکتی" 2 مئی کو گزر چکا ہے اور 8 مئی تک نیو منگلور پہنچنے کی توقع ہے۔

شرما نے واضح کیا کہ حکومت کی ترجیح ہے کہ بھارتی جہازوں اور کارگو کو جلد از جلد اس خطے سے نکالا جائے، اور اس مقصد کے لیے وزارتِ خارجہ کے ساتھ قریبی رابطہ رکھا جا رہا ہے۔ انہوں نے مزید کہا کہ بھارتی بندرگاہوں پر صورتحال معمول پر آ رہی ہے۔ پہلے جہاں گنجائش کا تناسب 80 فیصد تھا، اب کم ہو کر 60 فیصد رہ گیا ہے، جبکہ بندرگاہوں پر رکی ہوئی کنٹینرز کی تعداد میں تقریباً 99 فیصد کمی آ چکی ہے۔

متبادل بحری راستوں کے حوالے سے انہوں نے بتایا کہ CMA CGM، Maersk اور Unifeeder جیسی کمپنیوں کے ذریعے جے این پی اے، مندرا اور ہزیرا کو صحار، الفجیرہ اور خورفکن سے جوڑا گیا ہے، جس سے تجارتی سرگرمیاں جاری ہیں۔ انہوں نے کہا کہ اگرچہ آبنائے ہرمز کا کوئی متبادل راستہ موجود نہیں، تاہم حکومت اور صنعت دونوں سطحوں پر متبادل ذرائع تلاش کرنے کی کوششیں جاری ہیں۔

امریکی پالیسی سے متعلق سوال پر شرما نے تبصرہ کرنے سے گریز کرتے ہوئے کہا کہ آپریشن ایپک فیوری جیسے معاملات بین الاقوامی تعلقات سے جڑے ہیں، اور اس پر رائے دینا ان کے دائرہ کار میں نہیں آتا۔ تاہم انہوں نے یقین دلایا کہ بھارتی حکومت مجموعی طور پر صورتحال پر گہری نظر رکھے ہوئے ہے۔