نئی دہلی: دہلی ہائی کورٹ نے الفلاح ٹرسٹ سے متعلق منی لانڈرنگ اور مبینہ زمین پر ناجائز قبضے کے دو مقدمات میں ملزم جواد احمد صدیقی کو اپنی کینسر سے متاثرہ اہلیہ سے ملاقات کے لیے تین دن کی تحویل میں پیرول دینے کا حکم دیا ہے۔ تاہم عدالت نے چھ ہفتے کی عبوری ضمانت کی ان کی درخواست مسترد کر دی۔

جسٹس سوربھ بنرجی نے 13 جولائی کو جاری اپنے حکم میں کہا کہ موجودہ مقدمے کے تمام حقائق اور حالات کو مدنظر رکھتے ہوئے عدالت اس مرحلے پر درخواست گزار کو عبوری ضمانت دینے کی خواہش مند نہیں ہے۔

البتہ عدالت نے انسانی ہمدردی کی بنیاد پر جواد احمد صدیقی کو 21 جولائی۔ 23 جولائی اور 25 جولائی کو تحویل میں پیرول دینے کی اجازت دی تاکہ وہ اپنی بیمار اہلیہ سے ملاقات کر سکیں۔

عدالت نے کہا کہ اگرچہ وہ درخواست گزار کی اہلیہ کی طبی حالت سے ہمدردی رکھتی ہے لیکن ملزم کے خلاف عائد الزامات کی سنگینی۔ مقدمات کی نوعیت۔ ان کے مبینہ کردار اور انسداد منی لانڈرنگ قانون کے تحت ضمانت سے متعلق سخت قانونی تقاضوں کو نظر انداز نہیں کیا جا سکتا۔ عدالت نے یہ بھی کہا کہ فی الحال ایسا کوئی غیر معمولی یا ہنگامی سبب موجود نہیں جس کی بنیاد پر انہیں فوری طور پر رہا کیا جائے۔

ہائی کورٹ نے اپنے حکم میں یہ خدشہ بھی ظاہر کیا کہ اگر ملزم کو عبوری ضمانت دی گئی تو وہ فرار ہونے کی کوشش کر سکتے ہیں یا گواہوں کو متاثر کرنے اور شواہد میں مداخلت کرنے کا امکان موجود ہے۔

عدالت نے یہ بھی کہا کہ ریکارڈ پر ایسی کوئی بات موجود نہیں جس سے یہ ثابت ہو کہ ملزم کی اہلیہ آخری مرحلے کے کینسر میں مبتلا ہیں۔ بستر سے لگی ہوئی ہیں یا روزمرہ کے معاملات سنبھالنے سے قاصر ہیں۔ عدالت نے اس بات کا بھی حوالہ دیا کہ خود درخواست گزار نے بتایا ہے کہ ان کی اہلیہ فروری 2026 میں وہیل چیئر پر متحدہ عرب امارات کا سفر کر چکی ہیں اور ان کے ساتھ کوئی معاون بھی موجود نہیں تھا۔ بادی النظر میں اس سے ظاہر ہوتا ہے کہ وہ اپنی بنیادی ضروریات پوری کرنے کی صلاحیت رکھتی ہیں۔

عدالت نے جیل حکام کو ہدایت دی کہ چونکہ جواد احمد صدیقی ایک حساس نوعیت کے زیر سماعت قیدی ہیں اس لیے مناسب حفاظتی انتظامات کیے جائیں۔ انہیں 21 جولائی۔ 23 جولائی اور 25 جولائی کو صبح 10 بجے سے شام 4 بجے تک جامعہ نگر اوکھلا میں واقع الفلاح ہاؤس میں اپنی اہلیہ سے ملاقات کی اجازت ہوگی۔

عدالت نے واضح کیا کہ تحویل میں پیرول کے دوران وہ صرف اپنی اہلیہ سے ملاقات کر سکیں گے اور کسی دوسرے شخص سے ملنے یا گفتگو کرنے کی اجازت نہیں ہوگی۔

عدالت نے یہ بھی کہا کہ ریکارڈ پر ایسا کوئی ثبوت موجود نہیں جس سے معلوم ہو کہ گزشتہ عرصے کے دوران ملزم کی اہلیہ کو کوئی ہنگامی طبی صورتحال پیش آئی ہو یا انہوں نے کسی مرحلے پر فوری مدد طلب کی ہو۔ عدالت نے یہ بھی نوٹ کیا کہ ان کے قریبی رشتہ دار اسی علاقے یا چند کلومیٹر کے فاصلے پر رہتے ہیں اور ان کی مدد حاصل کرنے کی کوئی کوشش سامنے نہیں آئی۔

13 جولائی کو ہائی کورٹ نے جواد احمد صدیقی کی عبوری ضمانت کی درخواستوں پر فیصلہ محفوظ کر لیا تھا۔ ان کی جانب سے سینئر وکیل وکرم چودھری نے دلائل دیتے ہوئے کہا تھا کہ ان کی موکل کی اہلیہ کینسر میں مبتلا ہیں اور انہیں شوہر کی ضرورت ہے۔

دوسری جانب انفورسمنٹ ڈائریکٹوریٹ کے خصوصی وکیل ظہیب حسین نے عبوری ضمانت کی مخالفت کرتے ہوئے کہا کہ طبی ریکارڈ کے مطابق ملزم کی اہلیہ چوتھے مرحلے کے کینسر میں مبتلا نہیں ہیں۔ وہ علاج کروا رہی ہیں اور ادویات کا مثبت اثر بھی ہو رہا ہے۔ ایجنسی نے عدالت کو بتایا کہ انہیں 2022 سے کینسر ہے اور ان کی دیکھ بھال کے لیے خاندان کے دیگر افراد بھی موجود ہیں۔ مزید یہ کہ وہ فروری 2026 میں متحدہ عرب امارات کا سفر بھی کر چکی ہیں۔

انفورسمنٹ ڈائریکٹوریٹ نے یہ بھی کہا کہ جواد احمد صدیقی کے خلاف چار مقدمات درج ہیں اور اگر انہیں ضمانت دی گئی تو ان کے فرار ہونے کا خدشہ ہے۔

ایجنسی نے اپنی تحریری جواب میں الزام لگایا کہ جواد احمد صدیقی الفلاح ٹرسٹ اور الفلاح یونیورسٹی کے ذریعے این اے اے سی منظوری اور دیگر ضابطہ جاتی منظوریوں سے متعلق مبینہ غلط دعووں کی بنیاد پر وصول کی گئی فیس سے حاصل ہونے والی رقم کے اصل منصوبہ ساز اور فائدہ اٹھانے والے تھے۔ ایجنسی کے مطابق اس رقم کو مختلف خاندانی کمپنیوں اور بیرون ملک سرمایہ کاری میں منتقل کیا گیا۔

ایجنسی نے مزید دعویٰ کیا کہ تحقیقات کے دوران دبئی میں قائم جسما جیولرز ایل ایل سی نامی ادارے سے متعلق دستاویزات برآمد ہوئی ہیں جن سے معلوم ہوتا ہے کہ کمپنی میں پہلے جواد احمد صدیقی کی 30 فیصد شراکت تھی جسے بعد میں ان کے بیٹے افہم احمد صدیقی کے نام منتقل کر دیا گیا۔ انفورسمنٹ ڈائریکٹوریٹ کے مطابق ملزم نے اپنے بیٹے کو تحفے کے طور پر رقم منتقل کی جو بعد میں اسی کمپنی میں سرمایہ کاری کے لیے استعمال ہوئی۔

ایجنسی کا الزام ہے کہ الفلاح ٹرسٹ اور اس سے وابستہ اداروں سے حاصل ہونے والی مبینہ غیر قانونی رقم کو اہلیہ۔ بچوں اور قریبی ملازمین کی ملکیت والی کمپنیوں کے ذریعے بیرون ملک منتقل کر کے کاروبار اور جائیدادوں میں لگایا گیا۔ اس طرح بطور منیجنگ ٹرسٹی اور چانسلر انہوں نے خیراتی اور تعلیمی اداروں کو ذاتی اور خاندانی مفادات کے لیے استعمال کیا۔

واضح رہے کہ 9 جون کو ساکیت ضلع عدالت بھی جواد احمد صدیقی کی عبوری ضمانت کی دو درخواستیں مسترد کر چکی تھی۔ عدالت نے قرار دیا تھا کہ ملزم یہ ثابت کرنے میں ناکام رہے ہیں کہ ان کی اہلیہ ایسی حالت میں ہیں کہ انہیں شوہر کی مسلسل موجودگی درکار ہو یا ان کی دیکھ بھال کے لیے کوئی دوسرا بالغ فرد دستیاب نہ ہو۔ انفورسمنٹ ڈائریکٹوریٹ نے اس وقت بھی موقف اختیار کیا تھا کہ ملزم کو رہا کیے جانے کی صورت میں گواہوں پر اثر انداز ہونے اور شواہد میں مداخلت کا خدشہ موجود ہے۔