ممبئی

مہاراشٹر کے سابق نائب وزیرِ اعلیٰ اجیت پوار کے طیارہ حادثے کے معاملے میں ڈی جی سی اے اور وی ایس آر کمپنی کے خلاف ایف آئی آر درج کرانے کے لیے رکنِ اسمبلی روہت پوار آج بارامتی تعلقہ پولیس اسٹیشن پہنچے۔ روہت پوار کے ساتھ ان کے والد راجندر پوار اور یگندر پوار بھی موجود ہیں۔ بارامتی پولیس اسٹیشن کے باہر بارامتی کے لوگوں کی بڑی تعداد جمع ہے۔ ایف آئی آر درج کرانے کے مطالبے پر مقامی لوگ جارحانہ موقف اختیار کیے ہوئے ہیں۔

اس موقع پر بارامتی کے لوگ “ایک چا وعدہ اجیت دادا”، “امر رہے، امر رہے، اجیت دادا امر رہے” جیسے نعرے لگا رہے ہیں۔ بارامتی کے عوام نے اجیت پوار کے لیے انصاف کی اپیل کی ہے۔ روہت پوار نے کہا کہ یہ لڑائی عام عوام کی ہے اور اس میں رہنماؤں کو بھی ساتھ دینا چاہیے۔ اسی دوران بدھ کو رکنِ اسمبلی روہت پوار اور رکنِ اسمبلی امول متکاری نے ممبئی کے میرین ڈرائیو پولیس اسٹیشن میں اس معاملے میں ایف آئی آر درج کرانے کی کوشش کی، تاہم پولیس نے ایف آئی آر درج کرنے سے انکار کر دیا، جس پر پولیس اور روہت پوار کے درمیان تلخ کلامی ہوئی۔

ایف آئی آر درج کرانا میرا مکمل حق ہے: روہت پوار

پوار نے ارکانِ اسمبلی امول متکاری، ادریس نائیکواڑی اور سندیپ کھیرساگر کے ساتھ دی ہندو کو بتایا كہ ایک شہری کے طور پر ایف آئی آر درج کرانا میرا مکمل حق ہے۔ پولیس ایف آئی آر درج کرنے سے انکار نہیں کر سکتی۔ وہ کس بنیاد پر انکار کر رہی ہے؟ ہم دادا کی موت کی گہرائی سے جانچ چاہتے ہیں۔ ہم چاہتے ہیں کہ تمام سوالات کے جواب ملیں۔ میں کل بارامتی جا رہا ہوں۔ وہاں بھی اس مسئلے کو مسلسل اٹھاؤں گا اور ایف آئی آر درج کرانے کے لیے دباؤ ڈالوں گا۔

افسر نے کس کے احکامات پر کام کیا: روہت پوار

روہت پوار نے کہا کہ پولیس نے ایف آئی آر درج کرنے سے انکار کیا ہے۔ انہوں نے سوال اٹھایا: “افسر نے کس کے احکامات پر کام کیا؟

انہوں نے کہا كہ اگر مہاراشٹر کے نائب وزیرِ اعلیٰ کے ساتھ، جو اقتدار میں ان کے ساتھی تھے، ایسا کیا جا رہا ہے تو عام عوام انصاف کی کیا امید رکھ سکتی ہے؟ پولیس کے اس رویّے نے طیارہ حادثے سے متعلق ہماری شکوک و شبہات کو مزید بڑھا دیا ہے۔ اگر حزبِ اختلاف اور برسرِ اقتدار دونوں جماعتوں کے منتخب نمائندوں کے مطالبے کے باوجود پولیس ایف آئی آر درج کرنے کی درخواست کو نظرانداز کر رہی ہے تو یہ مہاراشٹر کے لیے بدقسمتی ہے۔

اسی دوران، میرین ڈرائیو پولیس اسٹیشن نے ایک بیان جاری کرتے ہوئے کہا کہ پہلے سے درج ایف آئی آر کے مطابق اس معاملے کی جانچ مہاراشٹر کرائم انویسٹی گیشن ڈیپارٹمنٹ کر رہا ہے۔ ڈی سی پی پروین منڈے نے بتایا کہ روہت پوار کی جانب سے دی گئی شکایت کو مزید جانچ کے لیے سی آئی ڈی کو بھیج دیا گیا ہے۔ این سی پی کے سربراہ اجیت پوار کا طیارہ حادثے میں انتقال ہو گیا ہے۔ ان کی اچانک موت نے پورے ملک کو صدمے میں ڈال دیا ہے۔ اس حادثے کے بعد سے تحقیقات کے مطالبات تیز ہو گئے ہیں۔ ہر کوئی جاننا چاہتا ہے کہ آخر اجیت پوار کا طیارہ حادثے کا شکار کیسے ہوا اور اس میں کس کی لاپرواہی شامل تھی۔