احمد آباد (گجرات): ایئر انڈیا کی ٹیم نے جمعہ کے روز ایئر انڈیا ٹریننگ اکیڈمی میں پرواز اے آئی 171 کے متاثرین کی یاد میں دو منٹ کی خاموشی اختیار کی۔ یہ تقریب اس المناک طیارہ حادثے کی پہلی برسی کے موقع پر منعقد کی گئی۔ ایئر انڈیا کی بدقسمت پرواز اے آئی 171، جو بوئنگ 787-8 ڈریم لائنر طیارے کے ذریعے احمد آباد سے لندن گیٹ وِک جا رہی تھی، اڑان بھرنے کے محض 32 سیکنڈ بعد ہولناک حادثے کا شکار ہو گئی تھی۔

طیارہ سردار ولبھ بھائی پٹیل بین الاقوامی ہوائی اڈے سے پرواز کے فوراً بعد قریبی علاقے میں گر کر تباہ ہو گیا تھا۔ دریں اثنا، حادثے کی پہلی برسی کے موقع پر منعقدہ پریس کانفرنس میں احمد آباد میونسپل کارپوریشن کے کمشنر بنچھانِدھی پانی نے متاثرین کو خراجِ عقیدت پیش کیا اور حادثے کے فوراً بعد کیے گئے امدادی اور بچاؤ کے مشترکہ اقدامات کو یاد کیا۔

انہوں نے کہا، ’’اس المناک فضائی حادثے کو ایک سال مکمل ہو گیا ہے۔ ہم ان تمام افراد کی روحوں کے سکون کے لیے دعا گو ہیں جو اب ہمارے درمیان نہیں ہیں۔ حادثے کے دن احمد آباد میونسپل کارپوریشن کے فائر، صحت اور انجینئرنگ محکموں کے ساتھ ریاستی اور مرکزی حکومت کے افسران نے فوری طور پر مربوط کارروائی کی تھی۔‘‘

کمشنر نے بتایا کہ امدادی کارروائیوں کے لیے 90 سے زائد ایمبولینسیں، 60 فائر یونٹس اور بھاری مشینری تعینات کی گئی تھی۔ انہوں نے کہا، ’’لاشوں کو نکالنے اور قریب واقع ہاسٹل میں پھنسے میڈیکل طلبہ کو بچانے کے لیے دیواریں تک توڑی گئیں۔‘‘ انہوں نے مزید کہا کہ حادثے کی تحقیقات اب بھی ایئرکرافٹ ایکسیڈنٹ انویسٹی گیشن بیورو (AAIB) کی نگرانی میں جاری ہیں اور میونسپل کارپوریشن اس سلسلے میں مکمل تعاون فراہم کر رہی ہے۔

بنچھانِدھی پانی کے مطابق، ’’متاثرین کے اہلِ خانہ کو فوری طور پر ڈیتھ سرٹیفکیٹس اور ڈی این اے نمونوں کے عمل میں مدد فراہم کی گئی۔ یہ تمام اقدامات حکومتِ ہند، ریاستی حکومت اور احمد آباد میونسپل کارپوریشن کی مشترکہ کوششوں سے انجام دیے گئے۔‘‘