نئی دہلی

وزیرِاعظم نریندر مودی نے اے آئی امپیکٹ سمٹ 2026 کے افتتاحی خطاب میں مصنوعی ذہانت (اے آئی) اور اس کے اثرات پر بات کرتے ہوئے اس وژن کو اجاگر کیا کہ ہندوستان اس ٹیکنالوجی کو اپنے تمام شہریوں کے لیے جمہوری اور قابلِ رسائی بنانا چاہتا ہے۔

انہوں نے کہا كہ میں آپ سب کا دنیا کی سب سے تاریخی اے آئی سمٹ میں خیرمقدم کرتا ہوں۔ ہندوستان دنیا کے سب سے بڑے ٹیک ٹیلنٹ کا مرکز ہے۔ یہ عالمی جنوب کے لیے فخر کی بات ہے کہ اے آئی سمٹ ہندوستان میں منعقد ہو رہی ہے۔ جب پہلی بار وائرلیس سگنلز منتقل کیے گئے تھے تو کسی نے یہ تصور نہیں کیا تھا کہ ایک دن پوری دنیا حقیقی وقت میں آپس میں جڑ جائے گی۔ مصنوعی ذہانت انسانی تاریخ کی ایسی ہی ایک بڑی تبدیلی ہے۔ آج ہم جو کچھ دیکھ رہے ہیں اور جس کی پیش گوئی کر رہے ہیں، وہ اس کے اثرات کی صرف شروعات ہے۔

انہوں نے مزید کہا كہ ہندوستان اے آئی کو فائدہ مند نقطۂ نظر سے دیکھتا ہے، اسی لیے ہم نے اپنے موضوع کے طور پر ’سروجَن ہتائے، سروجَن سکھائے‘ کو منتخب کیا ہے۔ ہمیں اے آئی کو سب کے لیے جمہوری بنانا ہے، خاص طور پر عالمی جنوب کے لیے۔ اے آئی مشینوں کو ذہین بنا رہی ہے، لیکن اس سے بڑھ کر یہ انسانی صلاحیتوں میں کئی گنا اضافہ کر رہی ہے۔ فرق صرف یہ ہے کہ اس بار رفتار بے مثال ہے اور دائرہ بھی غیر متوقع۔ پہلے ٹیکنالوجی کے اثرات ظاہر ہونے میں دہائیاں لگتی تھیں، آج مشین لرننگ سے سیکھنے والی مشینوں تک کا سفر پہلے سے کہیں زیادہ تیز، گہرا اور وسیع ہے۔

وزیرِاعظم نے اس بات پر بھی زور دیا کہ اے آئی کا خودمختار استعمال ایک بہتر قوم کی تعمیر میں مدد دے سکتا ہے اور یہ سمجھنا نہایت ضروری ہے کہ موجودہ دور میں ہم اے آئی کو کس طرح استعمال کریں۔

انہوں نے کہا كہ ہمیں ایک بڑا وژن رکھنا ہوگا اور اتنی ہی بڑی ذمہ داری بھی اٹھانی ہوگی۔ موجودہ نسل کے ساتھ ساتھ ہمیں یہ بھی سوچنا ہے کہ ہم آنے والی نسلوں کو کس شکل کی اے آئی سونپ کر جائیں گے۔ اس لیے آج اصل سوال یہ نہیں ہے کہ مصنوعی ذہانت مستقبل میں کیا کر سکتی ہے، بلکہ یہ ہے کہ ہم موجودہ وقت میں مصنوعی ذہانت کے ساتھ کیا کرتے ہیں۔ اس طرح کے سوالات پہلے بھی انسانیت کے سامنے آ چکے ہیں۔ اس کی سب سے طاقتور مثال ایٹمی توانائی ہے، جس کی تباہی بھی دیکھی گئی اور اس کے مثبت استعمال بھی۔ وزیرِاعظم نے اپنے وژن کو اجاگر کرتے ہوئے کہا کہ سب کی فلاح کو یقینی بنانے کے لیے اے آئی کو انسان مرکوز بنانا ناگزیر ہے۔

انہوں نے کہا كہ اے آئی ایک انقلابی طاقت ہے۔ اگر اس کی سمت درست نہ ہو تو یہ انتشار بن جاتی ہے، اور اگر صحیح سمت مل جائے تو حل بن جاتی ہے۔ اے آئی کو مشین مرکوز سے انسان مرکوز کیسے بنایا جائے، اسے حساس اور جواب دہ کیسے بنایا جائے، یہی اس عالمی اے آئی امپیکٹ سمٹ کا بنیادی مقصد ہے۔ اس سمٹ کا موضوع واضح طور پر اس نقطۂ نظر کی عکاسی کرتا ہے جس سے ہندوستان اے آئی کو دیکھتا ہے — سب کی فلاح، سب کی خوشی۔ یہی ہمارا پیمانہ ہے۔

انڈیا اے آئی امپیکٹ سمٹ نے نئی دہلی میں دنیا بھر سے سرکاری پالیسی سازوں، صنعت سے وابستہ اے آئی ماہرین، ماہرینِ تعلیم، ٹیکنالوجی کے موجدین اور سول سوسائٹی کو ایک پلیٹ فارم پر جمع کیا ہے تاکہ مصنوعی ذہانت پر عالمی سطح پر مباحث کو آگے بڑھایا جا سکے۔

عالمی جنوب میں منعقد ہونے والی پہلی عالمی اے آئی سمٹ کے طور پر، انڈیا اے آئی امپیکٹ سمٹ مصنوعی ذہانت کی انقلابی صلاحیتوں پر غور کرتی ہے، جو قومی وژن "سروجَن ہتائے، سروجَن سکھائے" (سب کی فلاح، سب کی خوشی) اور عالمی اصول اے آئی برائے انسانیت سے ہم آہنگ ہے۔ یہ سمٹ ایک ارتقائی بین الاقوامی عمل کا حصہ ہے، جس کا مقصد اے آئی کی حکمرانی، تحفظ اور سماجی اثرات کے حوالے سے عالمی تعاون کو مضبوط بنانا ہے۔