.webp "افغان وزیر خارجہ امیر خان متقی کا چھ روزہ ہند کا دورہ مکمل")
روانگی سے قبل امیر خان متقی کو شیخ الہند مولانا محمود حسن کے خاندان کی جانب سے ان کی مقدس چادر اور ٹوپی (فیض) تحفے میں پیش کی گئی۔
افغان وزارت خارجہ کے ڈائریکٹر آف پبلک کمیونیکیشن حافظ ضیا احمد کی جانب سے شیئر کی گئی ایک ویڈیو میں دیکھا جا سکتا ہے کہ امیر خان متقی چادر اور ٹوپی وصول کر رہے ہیں۔ حافظ ضیا احمد نے ایکس (سابق ٹوئٹر) پر لکھا، ’’بھارت میں شیخ الہند مولانا محمود حسن کے خاندان کی جانب سے ان کی چادر کا ایک حصہ اور ایک ٹوپی وزیر خارجہ امیر خان متقی کو بطور اعزاز اور برکت کے طور پر پیش کی گئی۔‘‘
ہفتے کے روز امیر خان متقی کا تاریخی دارالعلوم دیوبند آمد پر والہانہ استقبال کیا گیا۔ انہوں نے اے این آئی سے گفتگو کرتے ہوئے مقامی برادری کا شکریہ ادا کیا اور بھارت و افغانستان کے تعلقات کے مثبت رجحان کی تعریف کی۔
انہوں نے کہا، ’’یہ سفر بہت اچھا رہا۔ صرف دارالعلوم کے لوگ نہیں بلکہ پورے علاقے کے لوگ یہاں آئے۔ میں ان سب کا مشکور ہوں جنہوں نے میرا پرتپاک استقبال کیا۔‘‘ انہوں نے مزید کہا کہ ’’بھارت اور افغانستان کے تعلقات کا مستقبل بہت روشن نظر آتا ہے۔‘‘
دارالعلوم دیوبند ایک مشہور اسلامی درسگاہ ہے جس نے بھارت اور دنیا بھر میں بے شمار علما پیدا کیے۔ یہ ادارہ 1800 کی دہائی کے اواخر میں سید محمد عابد، فضل الرحمن عثمانی، مہتاب علی دیوبندی اور دیگر نے قائم کیا تھا۔ موجودہ کیمپس کی بنیاد مولانا محمد قاسم نانوتوی نے رکھی۔ یہاں بنیادی طور پر منقولات کی تعلیم دی جاتی ہے۔
10 اکتوبر کو وزیر خارجہ ایس جے شنکر نے افغان وزیر خارجہ امیر خان متقی سے تفصیلی ملاقات کی۔ اس ملاقات میں دونوں فریقین نے باہمی دلچسپی کے کئی اہم امور اور علاقائی پیش رفتوں پر تبادلہ خیال کیا۔
مشترکہ بیان میں کہا گیا، ’’بھارتی وزیر خارجہ نے افغان عوام کے ساتھ بھارت کی دیرینہ دوستی کو دہرایا اور دونوں اقوام کے درمیان گہرے ثقافتی اور تاریخی رشتوں کو اجاگر کیا۔ انہوں نے افغان عوام کی امنگوں اور ترقیاتی ضروریات کے لیے بھارت کے مسلسل تعاون کے عزم کا اعادہ کیا۔‘‘
