وارانسی/ آواز دی وائس
روس کے صدر ولادیمیر پوتن کے ہندوستان دورے کے پیشِ نظر وزیر اعظم نریندر مودی کے پارلیمانی حلقے وارانسی میں ’ہندوستان۔روس دوستی مارچ‘ کا انعقاد کیا گیا۔ ’وشال بھارت سنستھان‘ کی جانب سے منعقد یہ پدیاترا سوبھاش بھون سے شروع ہوکر منشی پریم چند سمرتھی گیٹ پر اختتام پذیر ہوئی۔ اس میں شامل لوگ مودی اور پوتن کے پوسٹر اٹھائے ہوئے تھے اور انہوں نے ہندوستان اور روس کے تعلقات مضبوط بنانے سے متعلق نعرے بھی لگائے۔
اس دوران لوگوں نے پوتن کی تصویر کے سامنے آرتی کی اور اس دورے کا جشن منانے کے لیے نقّارے بھی بجائے۔ وشال بھارت سنستھان کے صدر راجیو شری گروجی نے کہا کہ ہندوستان اور روس ’قدرتی دوست‘ ہیں اور مشکل وقت میں ہمیشہ ایک دوسرے کے ساتھ کھڑے رہے ہیں۔
انہوں نے کہا کہ مودی اور پوتن عالمی رہنما ہیں، جو جمہوریت، سرحدوں اور خودمختاری کے تحفظ کے لیے پُرعزم ہیں۔ ہندوستان اور روس مل کر دنیا کو امن کے راستے پر لے جائیں گے۔ روسی صدر کا یہ دورہ عالمی تبدیلی کا اشارہ ہے۔
سنستھان کی جنرل سکریٹری ڈاکٹر ارچنا بھارت ونشی نے کہا کہ ہندوستان۔روس کے مضبوط تعلقات سے ہندوستانی نوجوانوں کو فائدہ ہوگا، خاص طور پر تکنیکی اور طبی تعلیم کے شعبوں میں۔
