نئی دہلی

سوربھ بھاردواج نے ہفتہ کے روز نیٹ یو جی 2026 امتحان کے پرچہ لیک ہونے کے بعد امتحان منسوخ کیے جانے سے پیدا ہونے والے ذہنی دباؤ کے سبب مبینہ طور پر خودکشی کرنے والی ایک طالبہ کی موت پر گہرے رنج و غم کا اظہار کیا۔ بھاردواج نے جاری سی بی آئی جانچ پر سوال اٹھاتے ہوئے الزام لگایا کہ اصل مجرموں کو بچانے کے لیے معاملے پر پردہ ڈالنے کی کوشش کی جا رہی ہے۔

عام آدمی پارٹی دہلی کے صدر سوربھ بھاردواج، سابق ایم ایل اے اخلیش پتی ترپاٹھی اور دیگر آپ لیڈران نے آزاد پور میں متوفیہ نیٹ امیدوار کے گھر جا کر اہل خانہ سے ملاقات کی۔

اے این آئی سے بات کرتے ہوئے بھاردواج نے کہا کہ طالبہ نے ڈاکٹر بننے کے اپنے دیرینہ خواب کو پورا کرنے کے لیے کئی بار نیٹ امتحان دیا تھا۔ گزشتہ سال وہ صرف چار نمبروں سے میڈیکل کالج میں داخلہ حاصل کرنے سے محروم رہ گئی تھی اور اس بار اسے پورا یقین تھا کہ وہ امتحان کامیابی سے پاس کر لے گی۔ تاہم، امتحان منسوخ ہونے اور پرچہ لیک کی خبر نے اسے شدید ذہنی صدمہ پہنچایا، جس سے اس کا حوصلہ ٹوٹ گیا اور اسی وجہ سے اس نے اپنی جان لے لی۔

آپ دہلی صدر نے حکومت سے اپیل کی کہ نوجوانوں کو ایسے انتہائی اقدامات سے باز رہنے کا مشورہ دیا جائے اور یہ یقینی بنایا جائے کہ مبینہ بے ضابطگیوں کے ایسے واقعات دوبارہ پیش نہ آئیں۔انہوں نے کہا  کہ اس نے کئی بار نیٹ امتحان دیا تھا اور ڈاکٹر بننے کا خواب دیکھا تھا۔ گزشتہ سال وہ محض چار نمبروں سے داخلے سے محروم رہ گئی تھی، ورنہ آج وہ میڈیکل کالج میں ہوتی۔ یہ اس کا آخری موقع تھا اور سب کو یقین تھا کہ اس بار وہ نیٹ ضرور پاس کر لے گی۔ لیکن جب اسے معلوم ہوا کہ نیٹ کا پرچہ منسوخ ہو گیا ہے اور لیک بھی ہوا ہے تو وہ شدید صدمے میں چلی گئی۔ اسی ذہنی دھچکے کے باعث اس نے اپنے گھر میں پھانسی لگا کر خودکشی کر لی۔ میرا ماننا ہے کہ حکومت کو ملک کے نوجوانوں کو اعتماد دینا چاہیے اور اپیل کرنی چاہیے کہ وہ ایسے انتہائی قدم نہ اٹھائیں، ساتھ ہی سخت یقین دہانی بھی کرنی چاہیے کہ آئندہ اس طرح کے پرچہ لیک واقعات دوبارہ نہیں ہوں گے۔

انہوں نے پرچہ لیک معاملے کی جانچ پر بھی تشویش ظاہر کرتے ہوئے سوال اٹھایا کہ اتنے بڑے نیٹ ورک کا ماسٹر مائنڈ ایک پروفیسر کیسے ہو سکتا ہے۔ مختلف جرائم کی ناقص جانچ پر حکومت کو تنقید کا نشانہ بناتے ہوئے بھاردواج نے کہا کہ ان ’’غیر قانونی سرگرمیوں‘‘ میں ملوث ’’سیاست دانوں اور سرکاری افسران‘‘ کے نام سامنے لائے جانے چاہئیں۔

انہوں نے کہا کہ یہ جو پردہ ڈالنے کی کوشش کی جا رہی ہے، جیسے کہ یہ کہنا کہ ’ہم نے صرف پانچ دن میں ماسٹر مائنڈ کو پکڑ لیا‘، اسے فوراً بند ہونا چاہیے۔ کیا ایک اکیلا پروفیسر واقعی اتنے بڑے گینگ کا ماسٹر مائنڈ ہو سکتا ہے؟ آپ لوگ ایک ریپ کیس ایک مہینے میں حل نہیں کر پاتے، لیکن اتنے بڑے معاملے کو حل کرنے کا دعویٰ کر رہے ہیں۔ اصل مجرموں کے نام سامنے آنے چاہئیں، خاص طور پر وہ سیاست دان اور سرکاری افسران جن کی سرپرستی میں یہ غیر قانونی سرگرمیاں چل رہی ہیں۔

20 سالہ طالبہ نے دہلی میں مبینہ طور پر خودکشی کر لی تھی، جس کے بعد جمعرات کو اس کی لاش پولیس کو اطلاع دیے بغیر سیدھا شمشان گھاٹ لے جائی گئی۔جمعرات کو آدرش نگر پولیس اسٹیشن میں پی سی آر کال موصول ہوئی کہ ایک لڑکی کی لاش بغیر پولیس اطلاع کے کیول پارک شمشان گھاٹ لائی گئی ہے۔ جانچ کے دوران معلوم ہوا کہ اس نے مبینہ طور پر اپنے گھر میں پھانسی لگا کر خودکشی کی تھی۔ اہل خانہ قانونی کارروائی سے ناواقف تھے، اس لیے وہ لاش کو براہ راست آخری رسومات کے لیے لے گئے۔

دریں اثنا، مرکزی تفتیشی بیورو (سی بی آئی) نے جمعہ کو کہا کہ اس نے نیٹ یو جی 2026 پرچہ لیک معاملے میں ملوث ایک کیمسٹری پروفیسر کی شناخت کر کے اسے گرفتار کر لیا ہے۔

سی بی آئی کے مطابق ملزم کی شناخت پی وی کلکرنی کے طور پر ہوئی ہے، جو نیشنل ٹیسٹنگ ایجنسی کی جانب سے امتحانی عمل سے وابستہ ایک کیمسٹری لیکچرر تھا اور مبینہ طور پر نیٹ یو جی 2026 کے سوالیہ پرچوں تک اس کی رسائی تھی۔

ایجنسی نے کہا کہ جانچ سے معلوم ہوا ہے کہ اپریل 2026 کے آخری ہفتے میں کلکرنی نے ایک اور ملزمہ منیشا واگھمارے کے ساتھ مل کر پونے میں اپنے گھر پر منتخب طلبہ کے لیے خصوصی کوچنگ کلاسز کا اہتمام کیا تھا۔ واگھمارے کو سی بی آئی نے 14 مئی کو گرفتار کیا تھا۔سی بی آئی نے کہا، ’’ان کوچنگ سیشنز کے دوران وہ سوالات، ان کے اختیارات اور درست جوابات طلبہ کو لکھواتا تھا۔ طلبہ کی نوٹ بکس میں ہاتھ سے لکھے گئے سوالات بالکل وہی تھے جو 3 مئی 2026 کو منعقد نیٹ یو جی 2026 کے اصل کیمسٹری پرچے میں آئے تھے۔

ایجنسی کے مطابق، اصل میں لاتور سے تعلق رکھنے والے کلکرنی کو طویل پوچھ گچھ کے بعد پونے سے گرفتار کیا گیا۔

سی بی آئی نے کہا کہ اس معاملے کی جانچ ابھی جاری ہے۔