ممبئی : بالی ووڈ کی کلاسک فلم عمراؤ جان جس میں ریکھا نے مرکزی کردار ادا کیا ہے مئی میں برطانیہ کے ایشین فلم فیسٹیول میں خصوصی طور پر پیش کی جائے گی۔

ایشین فلم فیسٹیول کے انسٹاگرام کے مطابق نیشنل فلم آرکائیو آف انڈیا کی جانب سے بحال شدہ عمراؤ جان سات نو اور دس مئی کو اس باوقار فلمی میلے میں دکھائی جائے گی۔

جاری کردہ تفصیلات کے مطابق یہ فلم برطانیہ کے مختلف مقامات پر پیش کی جائے گی جن میں ٹائنی سائیڈ سنیما فینکس لیسٹر اور لینٹرن ہاؤس سنیما شامل ہیں جبکہ ایک موقع پر ہدایتکار مظفر علی کے ساتھ سوال و جواب کا سیشن بھی ہوگا۔

یہ کلاسک دور کی فلم ایک ایسی لڑکی کی کہانی بیان کرتی ہے جو اغوا ہونے کے بعد لکھنؤ کی ایک معروف طوائف اور شاعرہ بن جاتی ہے۔ فلم موسیقی جذبات اور اداسی کے عناصر سے بھرپور ہے اور بقا فن اور یادوں کی خوبصورت عکاسی پیش کرتی ہے۔

یہ پہلی بار نہیں کہ اس بحال شدہ فلم کو سینما گھروں یا فلمی میلوں میں پیش کیا جا رہا ہے بلکہ گزشتہ سال اسے انٹرنیشنل فلم فیسٹیول آف انڈیا میں بھی دکھایا گیا تھا۔

اس فلم میں شاندار اداکاری پر ریکھا کو قومی ایوارڈ سے نوازا گیا تھا جبکہ ان کا مشہور گانا دل چیز کیا ہے آج بھی شائقین میں بے حد مقبول ہے۔

فلم کے ہدایتکار مظفر علی نے اسے لازوال اور ہر دور میں زندہ رہنے والی فلم قرار دیا اور کہا کہ یہ ڈیڑھ سو سال پہلے کے دور کی عکاسی کرتی ہے اور اسی لیے آج بھی تازہ محسوس ہوتی ہے۔ انہوں نے یہ بھی کہا کہ فلم کو مزید فیسٹیولز میں لے جایا جائے گا اور بعد میں اسے او ٹی ٹی پلیٹ فارمز پر بھی پیش کیا جائے گا۔

عمراؤ جان ایک کلاسک ہندوستانی پیریڈ ڈرامہ ہے جو مرزا ہادی رسوا کے ناول عمراؤ جان ادا پر مبنی ہے۔ اس کی انیس سو اکیاسی کی فلمی شکل کو بہت زیادہ پذیرائی ملی اور اسے چار قومی ایوارڈز حاصل ہوئے جبکہ دو ہزار چھ کی فلم کو شائقین کی جانب سے زیادہ پسند نہیں کیا گیا۔