ممبئی/ آواز دی وائس

ہدایتکار آدتیہ دھر کی فلم ’دھورندھر‘ نے ریلیز کے ایک ماہ بعد بھی باکس آفس پر اپنی مضبوط گرفت برقرار رکھی ہوئی ہے۔ جس انداز سے فلم مسلسل کمائی کر رہی ہے، اس نے نہ صرف حالیہ ریلیز ہونے والی فلموں کو پیچھے چھوڑ دیا ہے بلکہ اب اس نے ہدایتکار ایس ایس راجامولی کی میگا بلاک بسٹر فلم ’آر آر آر‘ کا ریکارڈ بھی توڑ دیا ہے۔

فلم نے منگل تک 781.75 کروڑ روپے کا کاروبار کر لیا تھا اور اب بدھ کے کلیکشن کو دیکھیں تو فلم نے رام چرن اور جونیئر این ٹی آر کی فلم کو پیچھے چھوڑ دیا ہے۔ اس کی خاص وجہ ’دھورندھر‘ کی کہانی اور اسٹارز کی شاندار اداکاری ہے۔ اب یہ فلم گھریلو باکس آفس پر سب سے زیادہ کمائی کرنے والی فلموں کی فہرست میں چوتھے نمبر پر آ گئی ہے۔ اس سے آگے اب صرف تین فلمیں ہیں، جن کا ذکر آگے کیا گیا ہے۔

دھورندھر‘ نے توڑا ’آر آر آر‘ کا ریکارڈ

اوپننگ ڈے سے ہی شاندار کمائی کر رہی ’دھورندھر‘ کی ہر طرف تعریف ہو رہی ہے۔ فلم ناقدین، ناظرین سے لے کر بڑے بڑے فلم ساز اور ہدایتکار تک فلم دیکھنے کے بعد اپنے ریویوز شیئر کر رہے ہیں۔ اگر کلیکشن کی بات کریں تو ساکنِلک کی رپورٹ کے مطابق، بدھ دوپہر 2 بجے تک فلم نے مجموعی طور پر 782.76 کروڑ روپے کا بزنس کر لیا ہے۔ اسی کے ساتھ ایس ایس راجامولی کی فلم ’آر آر آر‘ کا ریکارڈ ٹوٹ گیا ہے۔ واضح رہے کہ رام چرن اور جونیئر این ٹی آر کی فلم نے ہندوستانی باکس آفس پر آل ٹائم 782.2 کروڑ روپے کا کاروبار کیا تھا۔

ان تین فلموں سے پیچھے ’دھورندھر‘

’آر آر آر‘ کا ریکارڈ توڑنے کے بعد اب رنویر سنگھ اور اکشے کھنہ اسٹارر فلم ’دھورندھر‘ صرف تین فلموں سے پیچھے ہے۔ ہندوستانی باکس آفس پر سب سے زیادہ کمائی کرنے والی فلم ’پشپا 2‘ ہے، جس نے 1234.1 کروڑ روپے کما کر پہلا نمبر حاصل کیا ہے۔ اس کے بعد دوسرے نمبر پر ’باہوبلی 2‘ ہے، جس نے 1030 کروڑ روپے کا کاروبار کیا۔ تیسرے نمبر پر یش کی فلم ’کے جی ایف چیپٹر 2‘ ہے، جس نے 859.7 کروڑ روپے کمائے تھے۔

ایسے میں اب ’دھورندھر‘ کی نظریں یش کی ’کے جی ایف چیپٹر 2‘ کا ریکارڈ توڑنے پر ہوں گی، لیکن یہ اتنا آسان نہیں ہوگا۔ دراصل دونوں فلموں کے درمیان فرق کافی زیادہ ہے اور اب ’دھورندھر‘ کی کمائی میں بھی سستی نظر آ رہی ہے۔ اس کے علاوہ اسی ماہ کے آخر میں ’بارڈر 2‘ بھی ریلیز ہونے والی ہے، جس کے بعد ’دھورندھر‘ کی باکس آفس رفتار مزید سست پڑ سکتی ہے۔