ممبئی 

تقریباً 14 برس بعد اپنے مشہور ٹاک شو ’موورز اینڈ شیکرز‘ کے بعد اداکار شیکھر سمن ایک بار پھر اپنے نئے ٹاک شو کے ساتھ واپسی کر رہے ہیں۔پیر کے روز شیکھر سمن اپنی اہلیہ الکا اور بیٹے ادھیان سمن کے ساتھ میڈیا ایونٹ میں اپنے نئے شو ’شیکھر ٹونائٹ‘ کی لانچنگ کے لیے ممبئی میں نظر آئے۔

اپنی واپسی کے بارے میں بات کرتے ہوئے شیکھر سمن نے ایک پریس نوٹ میں کہا  کہ میرے لیے ’شیکھر ٹونائٹ‘ صرف سیلیبریٹی انٹرویوز کا شو نہیں ہے، بلکہ یہ انسانی جذبات اور حقیقی لمحات کے بارے میں ہے۔ وہ باتیں جو ہمارے دل میں رہ جاتی ہیں، وہ کبھی پہلے سے تیار شدہ نہیں ہوتیں۔ وہ خاموشیاں، اچانک ہنسی، غیر متوقع لمحے اور وہ سچائیاں ہوتی ہیں جو لوگ اُس وقت ظاہر کرتے ہیں جب وہ خود کو کامل دکھانے کی کوشش چھوڑ دیتے ہیں۔

انہوں نے کہا کہ وقت کے ساتھ مجھے احساس ہوا کہ سب سے طاقتور گفتگو وہی ہوتی ہے جب لوگ بھول جاتے ہیں کہ کمرے میں کیمرہ بھی موجود ہے۔ یہی بے ساختگی آج بھی مجھے پرجوش بناتی ہے۔ اتنے برسوں بعد میں ایک بار پھر ایسی جگہ لوٹنا چاہتا تھا جہاں گفتگو کو سانس لینے کی آزادی ہو، جہاں جذبات اداکاری سے زیادہ اہم ہوں اور ایمانداری دکھاوے سے بڑھ کر ہو۔

شو کے خالق ادھیان سمن نے کہا، ’’یہ میرے لیے نہایت ذاتی اور جذباتی لمحہ ہے۔ یہ ایک دور، ایک فنکار، ایک آواز اور ایک ایسی شخصیت کی واپسی ہے جس نے اس ملک میں گفتگو پر مبنی تفریح کو نئی پہچان دی۔ میرے لیے اور ایک پوری نسل کے لیے شیکھر سمن ایک لیجنڈ ہیں۔ لوگ آج بھی ان کی حاضر جوابی، ان کے مونولاگ اور گفتگو پر ان کی مضبوط گرفت کو یاد کرتے ہیں۔

انہوں نے مزید کہا کہ میں نے بچپن سے اس جادو کو قریب سے دیکھا ہے اور وہ میرے دل میں ہمیشہ زندہ رہا۔ آج اتنے برسوں بعد انہیں اسی جذبے اور شاندار انداز کے ساتھ واپس آتے دیکھ کر میں بے حد جذباتی ہوں۔ کچھ بھی نہیں بدلا، بلکہ سب کچھ پہلے سے زیادہ طاقتور ہو گیا ہے۔ سب سے زیادہ متاثر کن بات یہ ہے کہ انہوں نے اپنی سچائی اور جادو کو آج تک برقرار رکھا ہے۔

ادھیان سمن نے کہا کہ میں اپنے پروڈیوسر اور کریئیٹو پارٹنر دھرمیش سنگھانی، سنگھانی برادرز اور کوبلڈ اسٹریٹ کا تہہ دل سے شکر گزار ہوں جنہوں نے میرے وژن پر یقین کیا اور مجھے اپنی شرائط پر یہ شو بنانے کی آزادی دی۔ میں رتیکا باجاج کا بھی شکریہ ادا کرنا چاہتا ہوں، جو اس سفر میں ہر روز پوری محنت اور لگن کے ساتھ ہمارے ساتھ کھڑی رہیں۔’شیکھر ٹونائٹ‘ میں فلم، سیاست، موسیقی، کھیل، کاروبار اور ثقافت سے وابستہ شخصیات شامل ہوں گی، جہاں بے ساختہ اور غیر اسکرپٹڈ گفتگو دیکھنے کو ملے گی۔ شو میں مزاح، جذبات، طنز اور بے ساختگی کا خوبصورت امتزاج پیش کیا جائے گا۔

یہ شو 15 مئی سے ہر جمعہ شیکھر سمن کے یوٹیوب چینل ’شیکھر سمن‘ پر نشر کیا جائے گا۔