ممبئی
اداکارہ سارا ارجن نے فلم ’’دھورندھر‘‘ میں رنویر سنگھ کے ساتھ کام کرنے کے اپنے تجربے کو شیئر کرتے ہوئے ان کی خوب تعریف کی ہے۔ انہوں نے کہا کہ رنویر ایک نہایت مخلص اور محنتی فنکار ہیں اور اپنے کام کے حوالے سے اتنے ہی حساس اور محافظ ہیں جتنا کوئی بچہ اپنی پسندیدہ چیز کے لیے ہوتا ہے۔
سارا کے مطابق رنویر خود کو فلم کا واحد مالک نہیں سمجھتے بلکہ اسے پوری ٹیم کی مشترکہ کاوش مانتے ہیں، اور چاہے اداکار ہوں یا تکنیکی عملہ، سب کے ساتھ یکساں عزت اور احترام سے پیش آتے ہیں۔ انہوں نے بتایا کہ فلم کی اسکرپٹ اور ٹیم کے واضح وژن کو دیکھتے ہوئے انہیں پہلے ہی اس کی کامیابی کا یقین ہو گیا تھا۔ ان کے مطابق جب کہانی مضبوط ہو تو اس کا اثر بھی مؤثر ہوتا ہے۔
سارا نے یہ بھی کہا کہ ان کے نزدیک کامیابی صرف باکس آفس یا ناقدین کی رائے تک محدود نہیں بلکہ ہر دن خود میں بہتری محسوس کرنا زیادہ اہم ہے۔اپنے اداکاری کے طریقۂ کار پر بات کرتے ہوئے انہوں نے کہا کہ وہ جذبات کے اظہار کے لیے اپنی ذاتی یادوں کا سہارا نہیں لیتیں، کیونکہ ان کے مطابق جذبات عارضی ہوتے ہیں۔ وہ کردار کی صورتحال اور اس کے احساسات کو سمجھ کر اداکاری کرتی ہیں۔
سارا نے اپنے والد کو اپنی سب سے بڑی حمایت قرار دیتے ہوئے کہا کہ انہی کی رہنمائی نے انہیں اداکاری کو سنجیدگی اور نظم و ضبط کے ساتھ لینے کا سبق دیا ہے۔
