نئی دہلی

فلم ساز امتیاز علی کی تقسیمِ ہند کے پس منظر پر مبنی ڈراما فلم "میں واپس آؤں گا"، جس میں نصیرالدین شاہ، دلجیت دوسانجھ، ویدانگ رائنا اور شرواری نے اداکاری کی ہے، باکس آفس پر شاندار کمائی کر رہی ہے۔ فلم کو ناظرین کی جانب سے ملنے والی زبردست پذیرائی اور مثبت تشہیر (ورڈ آف ماؤتھ) نے بڑی کامیابی دلائی ہے، جس پر امتیاز علی نے خوشی کا اظہار کیا ہے۔

اے این آئی سے گفتگو کرتے ہوئے امتیاز علی نے اپنی تازہ ریلیز کو ملنے والے بے پناہ پیار پر ناظرین کا شکریہ ادا کیا۔ انہوں نے تسلیم کیا کہ مثبت تبصروں اور زبانی تشہیر کی وجہ سے فلم کی باکس آفس کارکردگی میں نمایاں بہتری آئی ہے۔

امتیاز علی نے کہا  کہ جس دن فلم جمعہ کو ریلیز ہوئی تھی اور آج ایک ہفتے بعد پھر جمعہ ہے، تو آج کی کمائی پہلے جمعہ کے مقابلے میں شاید دگنی ہے۔ یہ سب عوام کی محبت اور ورڈ آف ماؤتھ کی بدولت ہوا ہے۔ یہ احساس بہت خوش کن ہے، میں خوش بھی ہوں اور کچھ حیران بھی۔ میں دل کی گہرائیوں سے عوام کا شکر گزار ہوں۔

انہوں نے بتایا کہ فلمی صنعت کے کئی معروف افراد نے انہیں پیغامات اور فون کالز کے ذریعے مبارکباد دی، جن میں رانی مکھرجی اور آیوشمان کھرانہ بھی شامل ہیں، جنہوں نے فلم کی بھرپور تعریف کی۔

امتیاز علی نے کہا کہ فلم کی ریلیز کے بعد کئی ہدایت کاروں اور اداکاروں نے مجھ سے رابطہ کیا، حوصلہ افزائی کی اور مبارکباد دی۔ سب سے پہلے نام شیخر کپور کا آتا ہے۔ انہوں نے کہا کہ جس کسی نے بھی فلم دیکھی، اس نے کوئی خامی نہیں نکالی بلکہ صرف اچھی باتیں ہی کیں۔ سبھاش گھئی نے بھی میری بہت حوصلہ افزائی کی۔

انہوں نے مزید کہا کہ آیوشمان کھرانہ نے ہماری فلم کا گانا نہایت محبت سے گایا اور سوشل میڈیا پر شیئر کیا، جس نے مجھے بہت متاثر کیا۔ حالانکہ یہ ان کی فلم نہیں ہے، لیکن یہی حقیقی دوستی اور محبت کی علامت ہوتی ہے۔ دیا مرزا، رانی مکھرجی اور کئی دیگر شخصیات نے بھی فلم کی تعریف کی۔ میں سب کے نام نہیں لینا چاہتا تاکہ یہ فلم کی تشہیر نہ لگے، لیکن میں سب کا بے حد شکر گزار ہوں۔جمعہ کے روز امتیاز علی نے دہلی کے مختلف سینما گھروں کا اچانک دورہ کیا، جس سے ناظرین خوشگوار حیرت میں مبتلا ہو گئے۔ وہ بغیر پیشگی اطلاع کے کئی سینما گھروں میں گئے، جہاں انہوں نے مداحوں سے ملاقات کی اور فلم کے بارے میں ان کی رائے معلوم کی۔

برلا اسٹوڈیوز اور اپلاز انٹرٹینمنٹ نے موہت چودھری اور شیباشیش سرکار کے ساتھ مل کر ونڈو سیٹ فلمز کے اشتراک سے اس فلم کو 12 جون کو سینما گھروں میں ریلیز کیا تھا۔