نئی دہلی

تقریباً ایک دہائی تک ‘راجا بابو’، ‘آنکھیں’ اور ‘پارٹنر’ جیسی بے حد کامیاب مزاحیہ فلموں کے ذریعے ہندی سنیما کو نیا انداز دینے والے ڈیوڈ دھون کی کچھ مشہور فلمیں ‘پی وی آر آئینوکس’ دوبارہ ریلیز کرنے جا رہا ہے۔

یہ فلمی فیسٹیول ان کی نئی فلم ‘ہے جوانی تو عشق ہونا ہے’ کی ریلیز سے پہلے ان کی خدمات کو خراجِ تحسین پیش کرنے کے لیے منعقد کیا جا رہا ہے۔دھون نے اداکار گووندا اور سلمان خان کے ساتھ مل کر 1990 کی دہائی میں کئی انتہائی تفریحی فلمیں پیش کیں۔ہندوستانی فلم و ٹیلی ویژن انسٹی ٹیوٹ سے تعلیم حاصل کرنے والے دھون کو فلمی دنیا میں 40 سال سے زیادہ کا تجربہ حاصل ہے، اور ان کی پہچان ایک منفرد فلم سازی کے انداز سے ہے جس میں مزاح اور خاندانی ڈرامے کا خوبصورت امتزاج نظر آتا ہے۔

‘پی وی آر آئینوکس لمیٹڈ’ کی چیف اسٹریٹجی افسر نہاریکا بجلی نے ڈیوڈ دھون اور دیگر فلم سازوں کا ان کی خدمات کے لیے شکریہ ادا کرتے ہوئے کہا کہ نئی نسل ان کی فلموں سے بہت کچھ سیکھ سکتی ہے۔دھون نے کہا کہ میرا مقصد ہمیشہ ایسی فلمیں بنانا رہا ہے جو لوگوں کو تفریح فراہم کریں اور انہیں روزمرہ کی مشکلات بھلانے میں مدد دیں۔ میری ہمیشہ یہی سوچ رہی ہے کہ چاہے صرف تین گھنٹوں کے لیے ہی سہی، لوگوں کو ہنسایا جائے، انہیں زندگی کے بارے میں اچھا محسوس کرایا جائے تاکہ وہ سنیما گھر سے مسکراتے ہوئے باہر نکلیں۔